जळगाव – लाईव्ह ट्रेंड्स न्यूज प्रतिनिधी । जागतिक लोकसंख्या दिनाचे औचित्य साधत गोदावरी नर्सिंग महाविद्यालयात राष्ट्रीय सेवा योजना (एनएसएस) युनिटच्या वतीने एक जनजागृतीपर उपक्रम उत्साहात पार पडला. वाढती लोकसंख्या, तिचे आरोग्यावर व पर्यावरणावर होणारे दुष्परिणाम आणि शाश्वत विकासासाठी आवश्यक उपाययोजना या विषयांवर लोकांमध्ये जागरूकता निर्माण करण्यासाठी या उपक्रमाचे आयोजन करण्यात आले.
या कार्यक्रमाचे आयोजन गोदावरी फाउंडेशनद्वारे संचालित आणि महाराष्ट्र आरोग्य विज्ञान विद्यापीठ, नाशिकशी संलग्न असलेल्या नॅक मान्यताप्राप्त गोदावरी नर्सिंग कॉलेजमध्ये करण्यात आले होते. कार्यक्रमाची सुरुवात रासेयो कार्यक्रम अधिकाऱ्यांच्या प्रास्ताविकाने झाली. त्यांनी लोकसंख्येची सद्यस्थिती उलगडून सांगताना संतुलित लोकसंख्येचे सामाजिक, आर्थिक व आरोग्यविषयक फायदे स्पष्ट केले.
कार्यक्रमांतर्गत आरोग्य जनजागृती सत्र आणि निबंध लेखन स्पर्धा हे दोन मुख्य उपक्रम राबवण्यात आले. आरोग्य जनजागृती सत्रात स्वयंसेवकांनी कुटुंब नियोजन, प्रजनन आरोग्य, मातृ व बालकल्याण यांसारख्या विषयांवर सखोल माहिती दिली. यासाठी पोस्टर प्रदर्शन, चार्ट्स, माहितीपर व्याख्याने आणि संवादात्मक चर्चा यांचा प्रभावी उपयोग करण्यात आला. महिलांच्या आरोग्यविषयक साक्षरतेवर विशेष भर देत आरोग्य व लोकसंख्येतील परस्परसंबंध स्पष्ट करण्यात आले.
निबंध लेखन स्पर्धेमध्ये विद्यार्थ्यांनी “लोकसंख्या वाढ आणि शाश्वत विकास” तसेच “युवावर्गाची भूमिका लोकसंख्या नियंत्रणात” या विषयांवर विचार मांडले. काही निवडक निबंधांचे वाचनही करण्यात आले. या स्पर्धेमुळे विद्यार्थ्यांमध्ये या विषयावरील जाणीव आणि समज वाढीस लागली.
या उपक्रमाद्वारे विद्यार्थ्यांमध्ये सामाजिक जबाबदारीची भावना वृद्धिंगत झाली. “मी नाही, तुम्ही” या रासेयोच्या ब्रीदवाक्यानुसार सामूहिक जबाबदारीची भावना ठळकपणे दिसून आली. जागतिक लोकसंख्या दिनाचे हे आयोजन मार्गदर्शक, प्रेरणादायी आणि यशस्वी ठरले असून विद्यार्थ्यांना सार्वजनिक आरोग्यविषयक मुद्यांमध्ये सक्रिय सहभागाची संधी मिळाली.
या उपक्रमातून शाश्वत विकासासाठी लोकसंख्येवर नियंत्रण आणि आरोग्य जनजागृती किती महत्त्वाची आहे, याची जाणीव तरुणाईला झाली. समाजाच्या सर्वांगीण विकासासाठी अशा कार्यक्रमांची आवश्यकता अधिक तीव्रतेने भासते.
