भुसावळ-लाईव्ह ट्रेंडस न्यूज प्रतिनिधी | भुसावळ शहरातील बाजारपेठ पोलीस ठाण्याच्या गुन्हे शोध पथकाने गुप्त माहितीच्या आधारे मुसावळ परिसरातील दोन ठिकाणी चैन स्नॅचिंग करणाऱ्या अट्टल आरोपीला अटक केली आहे. आरोपी मझर अब्बास जाफर (वय 18 वर्षे, रा. मुस्लीम कॉलनी, भुसावळ) याने अमळनेर आणि खामगाव तालुक्यात जबरीने सोन्याच्या दागिन्यांची चोरी केल्याची कबुली दिली आहे.
पोलीस पथकाने मझर अब्बास जाफर याला ताब्यात घेतल्यानंतर त्याने अमळनेर पोलीस ठाण्याच्या सीसीटीएनएस गुन्हा क्रमांक 0030/2025 (भादंवि कलम 309(4)) आणि जलम पोलीस ठाण्याच्या गुन्हा क्रमांक 275/2025 (भादंवि कलम 309(3), 4(5)) अन्वये गुन्ह्यांची कबुली दिली. त्याने अनुक्रमे 90,000/- रुपये किमतीची 12 ग्रॅम सोन्याची पोत आणि 70,000/- रुपये किमतीची 14.05 ग्रॅम सोन्याची चैन, असे एकूण 1,60,000/- रुपये किमतीचे दागिने चोरी केल्याचे स्पष्ट झाले आहे.
सदर आरोपीला पुढील तपासासाठी अमळनेर पोलीस ठाण्याच्या तपासी अधिकाऱ्यांच्या ताब्यात देण्यात आले आहे. या कारवाईत पोलीस अधीक्षक महेश्वर रेड्डी, अप्पर पोलीस अधीक्षक अशोक नखाते, उपविभागीय पोलीस अधिकारी कृष्णात पिंगळे आणि भुसावळ बाजारपेठ पोलीस ठाण्याचे निरीक्षक राहुल वाघ यांच्या मार्गदर्शनाखाली पोलीस उपनिरीक्षक मंगेश बाधन, तसेच पोलीस कर्मचारी विजय नेकरक, प्रशांत परदेशी, योगेश माळी, राहुल वानखेडे, भुषण चौधरी, सचिन चौधरी, अमर आढळे, योगेश महाजन यांनी महत्त्वपूर्ण भूमिका बजावली. पोलिसांनी अट्टल गुन्हेगाराला अटक करून मुसावळ परिसरातील नागरिकांना दिलासा दिला आहे. पुढील तपास सुरू असून आरोपीच्या अन्य गुन्ह्यांची चौकशी केली जात आहे.
