जळगाव-लाईव्ह ट्रेंडस न्यूज प्रतिनिधी | फैजपूर विभागाच्या सहाय्यक पोलीस अधीक्षिका अन्नपूर्णा सिंह यांची छत्रपती संभाजीनगर ग्रामीण येथे अप्पर पोलीस अधीक्षक म्हणून पदोन्नतीवर बदली करण्यात आली आहे. गृह विभागाने शुक्रवारी उशिरा याबाबतचे आदेश जारी केले.
सन २०२० च्या त्रिपुरा बॅचच्या आयपीएस अधिकारी असलेल्या अन्नपूर्णा सिंह यांनी डिसेंबर २०२३ मध्ये फैजपूर पोलीस उपविभागात डीवायएसपी पदाची जबाबदारी स्वीकारली होती. त्यापूर्वी त्यांची चोपडा उपविभागासाठी नियुक्ती करण्यात आली होती. कडक शिस्तीच्या आणि परिणामकारक कार्यशैलीसाठी ओळखल्या जाणाऱ्या अधिकाऱ्यांमध्ये त्यांचा समावेश आहे.
अन्नपूर्णा सिंह यांचा विवाह महाराष्ट्र २०१९ बॅचचे आयएएस अधिकारी अंकित (सीईओ, जिल्हा परिषद, जळगाव) यांच्यासोबत झाल्याने भारतीय पोलीस सेवा (कॅडर) नियम १९५४ नुसार, त्रिपुरा आणि महाराष्ट्र सरकारच्या सहमतीने त्यांना त्रिपुरा संवर्गातून महाराष्ट्र संवर्गात स्थानांतरित करण्यात आले.
फैजपूर येथे २२ डिसेंबर २०२३ रोजी झालेल्या बदल्यांनंतर त्या गेल्या १४ महिन्यांपासून डीवायएसपी पदावर कार्यरत होत्या. आता त्यांची छत्रपती संभाजीनगर ग्रामीण येथे अप्पर पोलीस अधीक्षक म्हणून पदोन्नतीवर नियुक्ती झाली आहे. गृह विभागाच्या उपसचिव व्यंकटेश भट यांच्या सहीने २८ फेब्रुवारी रोजी जारी करण्यात आलेल्या आदेशांमध्ये ही नियुक्ती जाहीर करण्यात आली.
