जळगाव लाईव्ह ट्रेंडस न्यूज प्रतिनिधी । जळगाव शहरातील रामेश्वर कॉलनी परिसरात बुधवारी, १६ जुलै रोजी सायंकाळी ५ वाजण्याच्या सुमारास आई आणि पत्नी वरच्या मजल्यावर असताना, कृष्णा रामदास पाटील (वय ४२) या व्यक्तीने राहत्या घराच्या खालच्या खोलीत गळफास घेऊन आपली जीवनयात्रा संपवली. या घटनेमुळे परिसरात हळहळ व्यक्त होत असून, त्यांच्या आत्महत्येचे कारण अद्याप अस्पष्ट आहे.
मिळालेल्या माहितीनुसार, कृष्णा रामदास पाटील हे रामेश्वर कॉलनी, जळगाव येथे आपली आई, पत्नी आणि दोन मुलांसह वास्तव्यास होते. बुधवार सायंकाळी ५ वाजेच्या सुमारास त्यांची आई आणि पत्नी घराच्या वरच्या मजल्यावर गेल्या होत्या. याच वेळी कृष्णा पाटील घरात एकटे असताना, त्यांनी राहत्या घराच्या खालच्या खोलीत गळफास घेतला. घरातील सदस्यांना ते गळफास घेतलेल्या अवस्थेत दिसताच, त्यांच्या आईने केलेला हृदय हेलावणारा आक्रोश ऐकून शेजारी मदतीला धावले. त्यांनी तात्काळ कृष्णा पाटील यांना खाली उतरवले आणि जिल्हा शासकीय वैद्यकीय महाविद्यालयात उपचारासाठी दाखल केले. मात्र, वैद्यकीय अधिकाऱ्यांनी त्यांना मृत घोषित केले.
कृष्णा पाटील यांच्या आत्महत्येमागील नेमके कारण अद्याप समोर आलेले नाही. त्यांच्या पश्चात आई, पत्नी, एक मुलगा आणि एक मुलगी असा परिवार आहे. या घटनेमुळे संपूर्ण कुटुंबावर आणि परिसरात शोककळा पसरली आहे. या प्रकरणी एमआयडीसी पोलीस ठाण्यात आकस्मिक मृत्यूची नोंद करण्यात आली आहे. आज, गुरुवारी सकाळी १०.३० वाजता शासकीय वैद्यकीय महाविद्यालयात शवविच्छेदन करून मृतदेह नातेवाईकांच्या ताब्यात देण्यात आला. पोलीस या प्रकरणाचा पुढील तपास करत आहेत.
