मुंबई – लाईव्ह ट्रेंड्स न्यूज वृत्तसेवा । महाराष्ट्र ऑलिम्पिक असोसिएशनच्या अध्यक्षपदासाठी गेल्या काही दिवसांपासून रंगलेल्या राजकीय चर्चांना अखेर पूर्णविराम लागला आहे. उपमुख्यमंत्री अजित पवार यांची सलग चौथ्यांदा महाराष्ट्र ऑलिम्पिक असोसिएशनच्या अध्यक्षपदी एकमताने निवड झाली असून, राज्यातील क्रीडा क्षेत्रासाठी हे एक महत्त्वाचे पाऊल ठरले आहे.
काही दिवसांपासून या निवडणुकीबाबत जोरदार चर्चेला उधाण आले होते. उपमुख्यमंत्री अजित पवार आणि केंद्रीय राज्यमंत्री मुरलीधर मोहोळ हे अध्यक्षपदाच्या शर्यतीत असल्याने राजकीय उत्सुकता वाढली होती. मात्र, अखेर महायुतीतील समन्वय आणि वाटाघाटींच्या माध्यमातून ही निवडणूक बिनविरोध पार पडली.
एकूण 31 सदस्य संघटनांपैकी 22 पेक्षा जास्त संघटनांनी अजित पवार यांना पाठिंबा दिला. त्यांच्या पॅनेलमधील आदिल सुमारिवाला, प्रदीप गंधे आणि प्रशांत देशपांडे यांची उपाध्यक्षपदावर निवड झाली असून ही निवडही बिनविरोध झाली आहे.
या निवडणुकीत महायुतीत समन्वय साधण्याचा प्रयत्न करण्यात आला. मुख्यमंत्री देवेंद्र फडणवीस, प्रफुल्ल पटेल आणि सुनील तटकरे यांच्या उपस्थितीत झालेल्या चर्चेत मुरलीधर मोहोळ यांच्या गटालाही काही पदे देण्याचा तोडगा काढण्यात आला. त्यानंतर मोहोळ यांनी अध्यक्षपदासाठीचा अर्ज मागे घेतला.
अजित पवार यांनी आता पुन्हा एकदा अध्यक्षपदाची सूत्रे हाती घेतली असून, ते पुढील दोन वर्षांत क्रीडा पायाभूत सुविधा, खेळाडू कल्याण आणि पारदर्शक प्रशासनावर लक्ष केंद्रित करणार असल्याचे संकेत दिले आहेत.
दरम्यान, या निवडणुकीत भाजपाने प्रथमच मोठी उडी घेतली होती. मुरलीधर मोहोळ यांनी या पदासाठी जोरदार हालचाली सुरू केल्या होत्या. मात्र, अखेर अजित पवार यांनी आपल्या राजकीय अनुभवाच्या बळावर भाजपाशी संवाद साधत समन्वय साधला आणि अध्यक्षपदी विराजमान झाले.
या निवडीमुळे महाराष्ट्रातील क्रीडा क्षेत्रात स्थैर्य आणि विकासाची दिशा कायम राहील, अशी अपेक्षा व्यक्त होत आहे. अजित पवार यांच्या नेतृत्वाखाली राज्यातील ऑलिम्पिक संघटनांना अधिक बळ मिळेल, असा विश्वास क्रीडा क्षेत्रातील तज्ज्ञांनी व्यक्त केला आहे.
