जळगाव-लाईव्ह ट्रेंड्स न्यूज प्रतिनिधी । जळगाव महानगरपालिकेचे आयुक्त ज्ञानेश्वर ढेरे यांची बदली करण्यात आली असून त्यांच्या जागी २०२१ बॅचचे आयएएस अधिकारी आदित्य जीवने यांची नियुक्ती करण्यात आली आहे. राज्य शासनाने आज जाहीर केलेल्या आयएएस अधिकाऱ्यांच्या बदल्यांमध्ये हा महत्त्वपूर्ण निर्णय घेण्यात आला असून आदित्य जीवने यांनी जळगाव महापालिका आयुक्तपदाचा कार्यभार स्वीकारला आहे.
गेल्या काही दिवसांपासून महापालिका आयुक्त ज्ञानेश्वर ढेरे यांच्या बदलीची चर्चा प्रशासन आणि राजकीय वर्तुळात सुरू होती. अखेर आज राज्य शासनाने आयएएस अधिकाऱ्यांच्या बदल्यांचे आदेश जारी करत या चर्चेला पूर्णविराम दिला. सध्या छत्रपती संभाजीनगर येथे महावितरणमध्ये संयुक्त संचालक (जॉइंट डायरेक्टर) म्हणून कार्यरत असलेले आदित्य जीवने यांची जळगाव महापालिकेच्या आयुक्तपदी नियुक्ती करण्यात आली आहे.
आदित्य जीवने हे केंद्रीय लोकसेवा आयोगाच्या (UPSC) २०२१ बॅचचे आयएएस अधिकारी असून प्रशासनातील त्यांची कार्यशैली आणि व्यवस्थापन कौशल्यामुळे त्यांची ओळख निर्माण झाली आहे. जळगाव महानगरपालिकेसमोरील विविध विकासकामे, पायाभूत सुविधा, स्वच्छता आणि नागरी सेवांच्या आव्हानांमध्ये त्यांच्या नेतृत्वाकडे नागरिकांचे लक्ष लागले आहे.
दरम्यान, आयुक्त ज्ञानेश्वर ढेरे यांची बदली नेमकी कोणत्या पदावर आणि कुठे करण्यात आली आहे, याबाबत अद्याप स्पष्ट माहिती समोर आलेली नाही. जळगाव महानगरपालिकेत नव्या आयुक्तांच्या नियुक्तीमुळे प्रशासनात बदलाचे नवे पर्व सुरू होणार असून आगामी काळात शहर विकासाच्या कामांना अधिक गती मिळण्याची अपेक्षा व्यक्त केली जात आहे.
