भुसावळ-लाईव्ह ट्रेंडस न्यूज प्रतिनिधी । भुसावळ तालुक्यातील शिंदी येथे एका २२ वर्षीय तरुणाने विषारी औषध घेऊन जीवन संपविण्याचा प्रयत्न केला होता. त्याच्यावर भुसावळ येथील खासगी रुग्णालयात उपचार सुरू होते, मात्र प्रकृती गंभीर झाल्याने त्याला जळगाव शासकीय रुग्णालयात दाखल करण्यात आले. उपचारादरम्यान मध्यरात्री त्याचा मृत्यू झाला, अशी माहिती पोलिसांनी दिली आहे. याप्रकरणी भुसावळ पोलीस स्टेशनला अकस्मात मृत्यूची नोंद करण्याची प्रक्रिया सुरू होती.
आकाश अशोक चव्हाण (वय २२, रा. शिंदी, ता. भुसावळ) असे मृत तरुणाचे नाव आहे. आकाश हा त्याची आई, लहान बहीण आणि आजोबा यांच्यासह राहत होता. त्याची आई हातमजुरी करून कुटुंबाचा उदरनिर्वाह करत होती, तर बहीण शिक्षण घेत होती. आकाश स्वतः पुणे येथे काम करून शिक्षण घेत होता. काही दिवसांपूर्वी त्याने विषारी औषध प्राशन करून आत्महत्येचा प्रयत्न केला होता, ज्यानंतर त्याला भुसावळ येथील खासगी रुग्णालयात दाखल करण्यात आले होते.
रविवारी भुसावळ येथील डॉक्टरांनी त्याला जळगाव येथील शासकीय वैद्यकीय महाविद्यालय व रुग्णालयात पुढील उपचारांसाठी हलवण्याचा सल्ला दिला. त्यानुसार त्याला जळगावात दाखल करण्यात आले, मात्र मध्यरात्री उपचारादरम्यान त्याचा मृत्यू झाला. आकाशच्या अकाली निधनामुळे कुटुंबीयांनी मोठा आक्रोश केला असून, शिंदी तालुक्यात हळहळ व्यक्त होत आहे. त्याच्या आत्महत्येमागचे नेमके कारण अद्याप स्पष्ट झालेले नाही.
