जळगाव लाईव्ह ट्रेंडस न्यूज प्रतिनिधी । जळगाव रेल्वे स्टेशन परिसरातील मालधक्क्यावर काम करत असताना एका तरुणाचा डोक्यात लोखंडी हुक पडल्याने दुर्दैवी मृत्यू झाल्याची घटना बुधवार, १८ जून रोजी सकाळी ११ वाजण्याच्या सुमारास घडली आहे. याप्रकरणी रेल्वे पोलीस स्टेशनमध्ये अकस्मात मृत्यूची नोंद करण्यात आली आहे. मयत तरुणाचे नाव कैलास रमेश माळी (वय २७, रा. पाळधी, ता. धरणगाव) असे आहे.
कष्टाळू तरुणाचा दुर्दैवी अंत
कैलास रमेश माळी हा आपल्या लहान भाऊ आणि काका यांच्यासोबत पाळधी येथे राहत होता. मालधक्क्यावर हमाल काम करून तो आपला उदरनिर्वाह करत होता. बुधवार, १८ जून रोजी तो नेहमीप्रमाणे कामावर हजर झाला होता. मालधक्क्यावर क्रेनच्या वाहनावर काम करत असताना, अचानक लोखंडी हुक तुटला आणि थेट कैलासच्या डोक्यात पडला. त्यामुळे त्याला जबर मार लागून त्याचा जागीच मृत्यू झाला.
पाळधी गावात शोककळा
आजूबाजूच्या कामगारांनी कैलास याला तात्काळ शासकीय वैद्यकीय महाविद्यालय व रुग्णालय येथे दाखल केले, परंतु वैद्यकीय अधिकाऱ्यांनी त्याला तपासून मृत घोषित केले. या घटनेची माहिती मिळताच हमाल कामगार आणि नातेवाईकांनी रुग्णालयात धाव घेतली. याबाबत रेल्वे पोलीस ठाण्यात अकस्मात मृत्यूची नोंद करण्यात आली आहे.
