जळगाव-लाईव्ह ट्रेंड्स न्यूज प्रतिनिधी । जळगावच्या ऐतिहासिक आणि पारंपरिक रथोत्सवाच्या तयारीला वेग आला असून, रथोत्सव मार्गावरील अडथळे दूर करण्यासाठी महापौर दीपमाला काळे यांनी पुढाकार घेतला आहे. मंगळवार, दि. १७ नोव्हेंबर रोजी त्यांनी श्रीराम मंदिर संस्थानपासून जुने जळगाव परिसरातील संपूर्ण रथोत्सव मार्गाची प्रत्यक्ष पाहणी केली. यावेळी रस्त्यांची डागडुजी, लोंबकळणाऱ्या विद्युत केबल्स हटविणे आणि पाणीपुरवठ्याचे योग्य नियोजन करण्याचे निर्देश संबंधित विभागांच्या अधिकाऱ्यांना देण्यात आले.
जळगावच्या रथोत्सवाला ऐतिहासिक आणि सांस्कृतिक महत्त्व असून, या उत्सवात मोठ्या संख्येने भाविक आणि नागरिक सहभागी होत असतात. रथ ज्या मार्गाने धावणार आहे, त्या मार्गावरील प्रत्येक रस्ता आणि गल्लीची महापौर काळे यांनी बारकाईने पाहणी केली. श्रीराम मंदिर संस्थानपासून सुरू होणाऱ्या मार्गावरील संभाव्य अडथळे, रस्त्यांची सद्यस्थिती आणि आवश्यक सुविधांचा त्यांनी आढावा घेतला.

पाहणीदरम्यान रस्त्याच्या मधोमध असलेल्या तसेच रथाच्या मार्गात अडथळा निर्माण करू शकणाऱ्या विद्युत केबल्सचा प्रश्न निदर्शनास आला. या केबल्समुळे रथोत्सवादरम्यान अडचण निर्माण होण्याची शक्यता लक्षात घेता, अशा सर्व केबल्स तातडीने बाजूला करण्याचे निर्देश महापौरांनी विद्युत विभागाला दिले. रथोत्सवाच्या मार्गावर सुरक्षिततेच्या दृष्टीने कोणताही अडथळा राहू नये, यासाठी संबंधित विभागांनी समन्वयाने काम करण्याच्या सूचनाही त्यांनी केल्या. याशिवाय, रथोत्सव मार्गावरील खराब झालेल्या रस्त्यांची तातडीने डागडुजी करण्याचे निर्देश देण्यात आले. ज्या ठिकाणी रस्त्यांची कामे प्रलंबित आहेत, ती कामेही वेळेत पूर्ण करून मार्ग रथोत्सवासाठी सुस्थितीत आणि सुरक्षित करावा, असे महापौरांनी संबंधित अधिकाऱ्यांना सांगितले. रथोत्सवाच्या दिवशी नागरिकांची आणि भाविकांची मोठी गर्दी होण्याची शक्यता असल्याने रस्त्यांची स्थिती चांगली असणे आवश्यक असल्याचे त्यांनी स्पष्ट केले.
रथोत्सव काळात नागरिकांना तसेच बाहेरगावाहून येणाऱ्या भाविकांना पाण्याची अडचण भासू नये, यासाठी पाणीपुरवठ्याचे योग्य नियोजन करण्याच्या सूचनाही महापौरांनी दिल्या. उत्सवाच्या कालावधीत आवश्यक त्या सुविधा उपलब्ध करून देण्यासाठी महानगरपालिकेच्या सर्व संबंधित विभागांनी वेळेत कामे पूर्ण करावीत, यावर त्यांनी भर दिला. या पाहणी दौऱ्याप्रसंगी नगरसेवक कल्पेश सोनवणे, शहर अभियंता आर. टी. पाटील, अभियंता जितेंद्र रंधे, पोलीस पाटील प्रभाकर पाटील यांच्यासह महानगरपालिकेच्या विविध विभागांचे अधिकारी आणि कर्मचारी उपस्थित होते.



