जळगाव-लाईव्ह ट्रेंड्स न्यूज प्रतिनिधी । जळगाव शहरातील गिरणा पंपिंग रस्त्यावरील श्यामनगर परिसरात चोरट्यांनी दिवाळीच्या सुट्यांचा फायदा घेत एकाचवेळी तीन बंद घरे फोडल्याची धक्कादायक घटना उघडकीस आली आहे. बाहेरगावी गेलेल्या कुटुंबांची घरे लक्ष्य करून चोरट्यांनी चोरीचा प्रयत्न केला. विशेष म्हणजे, या संपूर्ण प्रकारात सहभागी असलेले मंकी कॅप घातलेले तीन चोरटे परिसरातील सीसीटीव्ही कॅमेऱ्यांमध्ये कैद झाले आहेत. या घटनेमुळे श्यामनगर परिसरातील नागरिकांमध्ये भीतीचे वातावरण निर्माण झाले आहे.
गिरणा पंपिंग रस्त्यावरील श्यामनगर परिसरात ही घटना रामानंदनगर पोलीस ठाण्याच्या हद्दीत घडली. दिवाळीच्या सुट्यांमुळे अनेक कुटुंबे बाहेरगावी गेल्याची संधी साधून चोरट्यांनी बंद घरांना लक्ष्य केले. परिसरातील तीन घरांची कुलुपे तोडून आत प्रवेश करण्याचा प्रयत्न करण्यात आला. घरांना कुलूप असल्याची खात्री करून चोरट्यांनी चोरीचा डाव आखल्याचे सीसीटीव्ही फुटेजमधून समोर आले आहे.

या घटनेची माहिती परिसरातील नागरिकांनी दिल्यानंतर रामानंदनगर पोलिसांनी घटनास्थळी धाव घेत पाहणी केली. तसेच परिसरातील सीसीटीव्ही कॅमेऱ्यांचे फुटेज ताब्यात घेऊन चोरट्यांचा माग काढण्यास सुरुवात केली आहे. फुटेजमध्ये तीन संशयित चोरटे मंकी कॅप घालून घरांच्या परिसरात वावरताना दिसत आहेत. त्यांनी चेहरा झाकलेला असल्याने त्यांची ओळख पटविण्याचे पोलिसांसमोर आव्हान आहे. सीसीटीव्ही फुटेजमध्ये चोरट्यांची चोरी करण्याची पद्धतही स्पष्टपणे दिसत आहे. घराचे कुलूप तोडण्यासाठी त्यांनी कटरचा वापर केला. सुरुवातीला एका चोरट्याने कुलूप तोडण्याचा प्रयत्न केला; मात्र त्याला यश आले नाही. त्यानंतर दुसऱ्या चोरट्याने कटर हातात घेऊन कुलूप कापण्याचा प्रयत्न सुरू केला. तर तिसरा चोरटा हातात बॅटरी घेऊन परिसरात लक्ष ठेवताना दिसत आहे. तिघांनी समन्वयाने ही चोरी करण्याचा प्रयत्न केल्याचे फुटेजमधून दिसून येते.
दरम्यान, ज्या तीन घरांना चोरट्यांनी लक्ष्य केले, त्या तिन्ही घरांचे मालक सध्या बाहेरगावी आहेत. त्यामुळे घरातील नेमका किती ऐवज चोरीला गेला आहे किंवा किती नुकसान झाले आहे, याची अद्याप निश्चित माहिती समोर आलेली नाही. घरमालक गावावरून परतल्यानंतर घरातील साहित्याची तपासणी केल्यानंतर चोरीचा नेमका तपशील स्पष्ट होणार आहे. त्यानंतर संबंधितांकडून पोलिसांत अधिकृत तक्रार दाखल करण्यात येणार असल्याची माहिती आहे. दिवाळीसारख्या सणासुदीच्या काळात अनेक नागरिक कुटुंबासह बाहेरगावी जातात. अशा बंद घरांना लक्ष्य करून चोरीच्या घटना घडत असल्याने नागरिकांनी घरांच्या सुरक्षिततेबाबत अधिक सतर्क राहण्याची गरज निर्माण झाली आहे. श्यामनगरातील या घटनेतील सीसीटीव्ही फुटेजच्या आधारे पोलिसांनी संशयितांचा शोध घेऊन त्यांना लवकरात लवकर ताब्यात घ्यावे, अशी अपेक्षा परिसरातील नागरिकांकडून व्यक्त होत आहे.



