यावल-लाईव्ह ट्रेंड्स न्यूज प्रतिनिधी । क्रांतीसूर्य भगवान बिरसा मुंडा यांच्या १५१ व्या जयंतीनिमित्त ‘जनजातीय गौरव दिवस’ भव्य सोहळ्याचे आयोजन महाराष्ट्र शासनाच्या आदिवासी विकास विभागांतर्गत एकात्मिक आदिवासी विकास प्रकल्प, यावल (जि. जळगाव) यांच्या वतीने करण्यात आले आहे. हा राज्यस्तरीय व जिल्हास्तरीय महत्वपूर्ण सोहळा उद्या रविवार, दिनांक १५ नोव्हेंबर २०२६ रोजी सकाळी ११.०० वाजता नियोजन भवन, जिल्हाधिकारी कार्यालय, जळगाव येथे अत्यंत उत्साहात संपन्न होणार आहे. आदिवासी समाजाला स्वाभिमान, अस्मिता आणि हक्कांची जाणीव करून देणाऱ्या या महान क्रांतीकारकाच्या स्मृतींना याद्वारे उजाळा दिला जाणार आहे.
या सोहळ्याचे अध्यक्षस्थान राज्याचे पाणीपुरवठा व स्वच्छता मंत्री तथा जळगाव जिल्ह्याचे पालकमंत्री गुलाबराव पाटील भूषवणार आहेत. या कार्यक्रमाला प्रमुख अतिथी म्हणून केंद्रीय राज्यमंत्री (क्रीडा व युवक कल्याण विभाग) रक्षाताई खडसे, जलसंपदा व आपत्ती व्यवस्थापन मंत्री गिरीश महाजन आणि वस्त्रोद्योग मंत्री संजय सावकारे उपस्थित राहणार आहेत. याशिवाय जिल्ह्यातील सर्व सन्माननीय खासदार, विधानसभा व विधानपरिषद सदस्य तसेच जिल्हा प्रशासनातील वरिष्ठ अधिकारी यांची प्रमुख उपस्थिती या सोहळ्याला लाभणार आहे.
या भव्य कार्यक्रमाची सुरुवात सकाळी छत्रपती शिवाजी महाराज क्रीडांगण (जी.एस. ग्राऊंड), जळगाव येथून जिल्हाधिकारी कार्यालय, जळगावपर्यंत काढण्यात येणाऱ्या भव्य प्रभातफेरीने होणार आहे. या प्रभातफेरीत पारंपरिक आदिवासी वाद्यांचा गजर आणि विविध घोषणांच्या निनादातून आदिवासी संस्कृती, समृद्ध परंपरा तसेच क्रांतीसूर्य भगवान बिरसा मुंडा यांच्या गौरवशाली कार्याचा जनजागृतीपर संदेश दिला जाणार आहे. या सोहळ्यात उपस्थित मान्यवरांकडून आदिवासी समाजाचा सर्वांगीण विकास, शासनाच्या विविध कल्याणकारी योजना, शैक्षणिक प्रगती तसेच आदिवासी बांधवांच्या सामाजिक व आर्थिक उन्नती संदर्भात बहुमोल मार्गदर्शन केले जाणार आहे.
कार्यक्रमाच्या उत्तरार्धात शासनाच्या विविध वैयक्तिक व सामूहिक कल्याणकारी योजनांमधील पात्र लाभार्थ्यांना प्रातिनिधिक स्वरूपात प्रमाणपत्रे व आर्थिक सहाय्याचे वितरण करण्यात येणार आहे. यामध्ये प्रामुख्याने ‘राणी दुर्गावती आदिवासी महिला सक्षमीकरण योजने’सह इतरही विविध महत्त्वाच्या योजनांच्या लाभांचे वितरण करून आदिवासी बांधवांना मुख्य प्रवाहात आणण्यासाठी शासकीय साहाय्य उपलब्ध करून दिले जाणार आहे. आदिवासी समाजाचा गौरवशाली इतिहास, समृद्ध संस्कृती, पारंपरिक कला, सामाजिक अस्मिता आणि विकासाचा जागर करणारा हा सोहळा जळगाव जिल्ह्यासाठी अत्यंत अभिमानास्पद ठरणार आहे.
भगवान बिरसा मुंडा यांच्या क्रांतिकारी विचारांचा आणि संघर्षाचा वारसा नव्या पिढीपर्यंत पोहोचविण्याच्या तसेच आदिवासी समाजाच्या सर्वांगीण प्रगतीला गती देण्याच्या उद्देशाने या सोहळ्याचे आयोजन करण्यात आले आहे. त्यामुळे जळगाव जिल्ह्यातील सर्व आदिवासी बांधव, भगिनी, विद्यार्थी, युवक-युवती तसेच नागरिकांनी मोठ्या संख्येने उपस्थित राहून या ऐतिहासिक सोहळ्याची शोभा वाढवावी, असे आवाहन प्रकल्प अधिकारी अरुण पवार (एकात्मिक आदिवासी विकास प्रकल्प, यावल) यांच्या वतीने करण्यात आले आहे.
क्रांतीसूर्य भगवान बिरसा मुंडा यांच्या १५१ व्या जयंतीनिमित्त उद्या जळगावातील नियोजन भवन येथे ‘जनजातीय गौरव दिवस’ सोहळा आयोजित करण्यात आला आहे. पालकमंत्री गुलाबराव पाटील यांच्या अध्यक्षतेखाली आणि केंद्रीय मंत्री रक्षाताई खडसे, मंत्री गिरीश महाजन व मंत्री संजय सावकारे यांच्या प्रमुख उपस्थितीत होणाऱ्या या सोहळ्यात विविध कल्याणकारी योजनांच्या लाभांचे वितरण व भव्य प्रभातफेरी काढण्यात येणार आहे.
