जळगाव-लाईव्ह ट्रेंड्स न्यूज प्रतिनिधी । जळगाव जिल्हा पोलीस दलाच्या वतीने पोलीस कवायत मैदानावर आयोजित आधुनिक शस्त्र प्रदर्शनाला प्रमुख जिल्हा व सत्र न्यायाधीश आर. एन. जोशी, जिल्हाधिकारी रोहन घुगे आणि महापौर दीपमाला काळे यांनी भेट देऊन प्रदर्शनाची पाहणी केली. या प्रदर्शनाच्या माध्यमातून आधुनिक शस्त्रास्त्रे, पोलीस दलाची सज्जता तसेच कायदा व सुव्यवस्था राखण्यासाठी वापरण्यात येणाऱ्या विविध साधनांची माहिती मान्यवरांनी जाणून घेतली.
पोलीस अधीक्षक श्रीकांत धिवरे यांच्या मार्गदर्शनाखाली जळगाव जिल्हा पोलीस दलातर्फे या आधुनिक शस्त्र प्रदर्शनाचे आयोजन करण्यात आले होते. पोलीस दलाकडे उपलब्ध असलेली आधुनिक शस्त्रास्त्रे आणि विविध सुरक्षा साधने यांची माहिती नागरिकांपर्यंत पोहोचविणे, तसेच कायदा व सुव्यवस्था राखताना पोलिसांना आवश्यक असलेल्या साधनांची ओळख करून देणे, या दृष्टीने अशा प्रदर्शनांना महत्त्व आहे. प्रदर्शनाला भेट दिल्यानंतर प्रमुख जिल्हा व सत्र न्यायाधीश आर. एन. जोशी, जिल्हाधिकारी रोहन घुगे आणि महापौर दीपमाला काळे यांनी तेथे मांडण्यात आलेल्या आधुनिक शस्त्रास्त्रांची आणि सुरक्षा साधनांची माहिती घेतली. पोलीस दलाची कार्यतत्परता, उपलब्ध साधनसामग्री आणि विविध परिस्थितींमध्ये कायदा व सुव्यवस्था राखण्यासाठी केली जाणारी तयारी, या बाबी प्रदर्शनाच्या माध्यमातून समजून घेण्यात आल्या.
जिल्ह्यात कायदा व सुव्यवस्था अबाधित राखणे, नागरिकांची सुरक्षितता सुनिश्चित करणे आणि विविध परिस्थितींना सामोरे जाण्यासाठी पोलीस दल सज्ज ठेवणे, यासाठी आधुनिक साधनसामग्री महत्त्वाची ठरते. या प्रदर्शनातून पोलीस दलाच्या कार्यपद्धतीची आणि सुरक्षा व्यवस्थेची माहिती जाणून घेण्याची संधी उपलब्ध झाली. या प्रदर्शनाचे आयोजन पोलीस अधीक्षक श्रीकांत धिवरे यांच्या मार्गदर्शनाखाली करण्यात आले. अपर पोलीस अधीक्षक संदीप गावित आणि चाळीसगावचे अपर पोलीस अधीक्षक अशोक नखाते यांचेही या उपक्रमासाठी मार्गदर्शन लाभले.
