यावल-लाईव्ह ट्रेंड्स न्यूज प्रतिनिधी | मुख्यमंत्री सहाय्यता निधीतून जिल्ह्यातील दोन गरजू रुग्णांना वैद्यकीय उपचारांसाठी प्रत्येकी २ लाख रुपयांची मदत विशेष बाब म्हणून मंजूर करण्यात आली आहे. आमदार अमोल दादा जावळे यांनी केलेल्या पाठपुराव्यासह मुख्यमंत्री सहायता कक्ष व धर्मादाय रुग्णालय मदत कक्षाचे प्रमुख रामेश्वर नाईक यांच्या सहकार्यामुळे दिव्यांशू तायडे आणि गुलाब ठाकरे यांना एकूण ४ लाख रुपयांचे अर्थसहाय्य मिळणार असून, त्यांच्या कुटुंबांना मोठा दिलासा मिळाला आहे.
दिव्यांशू तायडे यांना अस्थिमज्जा प्रत्यारोपणाच्या (बोन मॅरो ट्रान्सप्लांट) उपचारांसाठी २ लाख रुपये, तर गुलाब ठाकरे यांना मूत्रपिंड प्रत्यारोपणाच्या (किडनी ट्रान्सप्लांट) उपचारांसाठी २ लाख रुपयांची मदत मंजूर झाली आहे. या दोन्ही उपचारांचा खर्च मोठा असल्याने आर्थिक अडचणींचा सामना करणाऱ्या रुग्णांना या मदतीचा लाभ होणार आहे.
गरजू रुग्णांना आर्थिक मदत मिळावी, यासाठी आमदार अमोल दादा जावळे यांनी शासन स्तरावर पाठपुरावा केला. मुख्यमंत्री सहायता कक्ष व धर्मादाय रुग्णालय मदत कक्षाचे प्रमुख रामेश्वर नाईक यांच्या सहकार्याने मुख्यमंत्री सहाय्यता निधीतून विशेष बाब म्हणून ही मदत मंजूर झाली.
या मदतीबद्दल रुग्णांच्या नातेवाइकांनी आमदार अमोल दादा जावळे आणि रामेश्वर नाईक यांचे आभार व्यक्त केले. गंभीर आजारांवरील उपचारांसाठी आर्थिक मदत उपलब्ध करून देण्यात मुख्यमंत्री सहाय्यता निधी महत्त्वाची भूमिका बजावत आहे. गरजू रुग्णांना वेळेत मदत मिळाल्याने त्यांच्या कुटुंबांना मोठा आधार मिळत आहे.
