जळगाव-लाईव्ह ट्रेंड्स न्यूज प्रतिनिधी । गोदावरी कॉलेज ऑफ इंजिनिअरिंग (तंत्रनिकेतन), जळगाव येथील डिप्लोमा अभ्यासक्रमाच्या विद्यार्थ्यांनी जळगाव जिल्हा सहकारी दूध उत्पादक संघ मर्यादितच्या ‘विकास दूध फेडरेशन’ प्रकल्पाला औद्योगिक शैक्षणिक भेट दिली. अभ्यासक्रमातून मिळणाऱ्या सैद्धांतिक ज्ञानाला प्रत्यक्ष औद्योगिक अनुभवाची जोड मिळावी आणि आधुनिक तंत्रज्ञानाच्या कार्यपद्धतीची विद्यार्थ्यांना माहिती व्हावी, या उद्देशाने या भेटीचे आयोजन करण्यात आले होते.
या औद्योगिक भेटीदरम्यान विकास दूध फेडरेशनमधील तज्ज्ञ अधिकाऱ्यांनी विद्यार्थ्यांना दूध संकलनापासून ते अंतिम उत्पादनाच्या पॅकेजिंगपर्यंतच्या विविध प्रक्रियांची सविस्तर माहिती दिली. दूध संकलन, शीतकरण व रिफ्रिजरेशन, पाश्चरायझेशन, प्रक्रिया तसेच पॅकेजिंग या प्रत्येक टप्प्याची कार्यपद्धती विद्यार्थ्यांनी जाणून घेतली. दूध प्रक्रिया आणि पॅकेजिंगमध्ये वापरण्यात येणाऱ्या स्वयंचलित प्रणालींचे विद्यार्थ्यांनी प्रत्यक्ष निरीक्षण केले. दूध पावडर, तूप, पनीर, श्रीखंड यांसह विविध दुग्धजन्य पदार्थांचे उत्पादन आधुनिक ऑटोमेशन व तंत्रज्ञानाच्या साहाय्याने कशा पद्धतीने केले जाते, याबाबतही विद्यार्थ्यांना मार्गदर्शन करण्यात आले.
उत्पादन प्रक्रियेत वापरल्या जाणाऱ्या विविध यंत्रसामग्री, नियंत्रण प्रणाली, इलेक्ट्रिकल सिस्टीम तसेच स्वयंचलित यंत्रणांचे प्रत्यक्ष प्रात्यक्षिक विद्यार्थ्यांनी पाहिले. औद्योगिक उत्पादन प्रक्रियेत ऑटोमेशन, विद्युत नियंत्रण, रिफ्रिजरेशन आणि इंडस्ट्रीयल मॅनेजमेंट यांची असलेली महत्त्वपूर्ण भूमिका विद्यार्थ्यांनी उत्सुकतेने समजून घेतली. या भेटीमुळे विद्यार्थ्यांना वर्गातील पुस्तकी ज्ञान आणि प्रत्यक्ष औद्योगिक प्रक्रियांमधील संबंध समजून घेण्यास मदत झाली. विविध यंत्रणा प्रत्यक्ष पाहता आल्याने तांत्रिक विषयांबाबतची विद्यार्थ्यांची उत्सुकता वाढली असून, औद्योगिक क्षेत्रातील आधुनिक तंत्रज्ञानाची कार्यपद्धती समजून घेण्यासाठी या भेटीचा उपयोग झाला.
या शैक्षणिक भेटीचे मार्गदर्शन महाविद्यालयाचे प्राचार्य डॉ. विजयकुमार पाटील, पॉलिटेक्निक समन्वयक प्रा. दीपक झांबरे आणि अकॅडमिक डीन प्रा. नितीन पाटील यांनी केले. यावेळी प्रा. वैभव झांबरे, प्रा. सचिन चिंचोले, प्रा. हर्षा पाटील, प्रा. ऋतुजा पाटील आणि प्रा. आकाश मुराई उपस्थित होते. विद्यार्थ्यांच्या तांत्रिक ज्ञानात भर घालणाऱ्या या उपक्रमाचे गोदावरी फाउंडेशनचे अध्यक्ष डॉ. उल्हास पाटील, सचिव डॉ. वर्षा पाटील, सदस्य डॉ. केतकी पाटील, डॉ. वैभव पाटील आणि डॉ. अनिकेत पाटील यांनी कौतुक केले. औद्योगिक शैक्षणिक भेटींमुळे विद्यार्थ्यांना भविष्यातील तांत्रिक आणि औद्योगिक क्षेत्रासाठी आवश्यक असलेले व्यावहारिक ज्ञान मिळण्यास मदत होते.
