बुलढाणा-लाईव्ह ट्रेंड्स न्यूज प्रतिनिधी । राज्यातील दुष्काळी परिस्थितीच्या पार्श्वभूमीवर शेतीसह सर्वच ग्राहकांचा वीजपुरवठा सुरळीत ठेवण्यासाठी महावितरणने संपूर्ण तांत्रिक यंत्रणा ‘हायअलर्ट’वर ठेवली आहे. दुष्काळ उपाययोजनांची प्रभावी अंमलबजावणी आणि वीजपुरवठ्यातील अडथळे तातडीने दूर करण्यासाठी अभियंते, यंत्रचालक आणि तारमार्ग कर्मचाऱ्यांना मुख्यालय सोडण्यास सक्त मनाई करण्यात आली आहे. याबाबत महावितरणचे संचालक (संचालन) धनंजय औंढेकर यांनी परिपत्रक जारी केले आहे.
यंदाच्या जून महिन्यापासून राज्यातील पर्जन्यमानात मोठी तूट नोंदवण्यात आली असून राज्याच्या बहुतांश भागात दुष्काळी परिस्थिती निर्माण झाली आहे. कमी पावसामुळे शेती पिकांवरही परिणाम झाला असून ग्रामीण भागात पाणी आणि वीजपुरवठ्याचे महत्त्व अधिक वाढले आहे. या पार्श्वभूमीवर राज्य शासनाने विविध दुष्काळ निवारणाच्या उपाययोजना जाहीर केल्या आहेत. त्यानुसार महावितरणनेही आपली तांत्रिक यंत्रणा अधिक सतर्क केली आहे. मुख्यमंत्री यांचे अपर मुख्य सचिव तथा महावितरणचे अध्यक्ष व व्यवस्थापकीय संचालक लोकेश चंद्र यांच्या आदेशानुसार महावितरणच्या वरिष्ठ अधिकाऱ्यांनी विविध परिमंडलांमध्ये तातडीने दौरे केले. संचालक धनंजय औंढेकर (संचालन), योगेश गडकरी (वाणिज्य), सचिन तालेवार (प्रकल्प), राजेंद्र पवार (मानव संसाधन) यांच्यासह सर्व कार्यकारी संचालकांनी संबंधित भागातील वीजयंत्रणेची पाहणी करून दुष्काळी परिस्थितीत आवश्यक तांत्रिक उपाययोजनांचा आढावा घेतला.
या दौऱ्यांदरम्यान विशेषतः कृषिपंपांसह सर्व वर्गवारीतील ग्राहकांना सुरळीत वीजपुरवठा मिळण्यासाठी आवश्यक असलेल्या तांत्रिक कामांचा आढावा घेण्यात आला. दुष्काळाच्या काळात शेतीसाठी वीजपुरवठा अत्यंत महत्त्वाचा असल्याने वीजयंत्रणेत बिघाड झाल्यास त्याची दुरुस्ती कमीत कमी वेळेत करण्याच्या सूचना संबंधित अधिकाऱ्यांना देण्यात आल्या आहेत. महावितरणने सर्व क्षेत्रीय कार्यालयांतील अभियंते, यंत्रचालक आणि तारमार्ग कर्मचाऱ्यांना आपापल्या मुख्यालयात उपस्थित राहण्याचे आदेश दिले आहेत. पूर्वपरवानगीशिवाय कोणत्याही अधिकारी किंवा कर्मचाऱ्याला मुख्यालय सोडता येणार नाही, असे परिपत्रकात स्पष्ट करण्यात आले आहे. त्यामुळे दुष्काळी परिस्थितीत वीजयंत्रणेची देखभाल आणि आपत्कालीन दुरुस्तीची कामे तातडीने करता यावीत, यासाठी मनुष्यबळ उपलब्ध ठेवण्यावर भर देण्यात आला आहे.
दुष्काळी परिस्थितीत वीजपुरवठा खंडित झाल्यास त्याचा थेट परिणाम शेतीसह इतर ग्राहकांवर होऊ शकतो. त्यामुळे एखाद्या कारणामुळे वीजपुरवठा खंडित झाल्यास पर्यायी व्यवस्थेतून किंवा तातडीने दुरुस्तीची कामे करून वीजपुरवठा पूर्ववत करण्याचे निर्देश देण्यात आले आहेत. स्थानिक पातळीवर उद्भवणाऱ्या तांत्रिक अडचणींवर तत्काळ कार्यवाही करण्यासाठी संबंधित कर्मचाऱ्यांनी मुख्यालयात उपलब्ध राहणे आवश्यक असल्याचे महावितरणने स्पष्ट केले आहे. वीजपुरवठा सुरळीत ठेवण्याच्या या कामात कोणत्याही प्रकारची हयगय किंवा निष्काळजीपणा केल्यास संबंधित अधिकारी-कर्मचाऱ्यांविरुद्ध शिस्तभंगाची कारवाई केली जाईल, असा इशाराही परिपत्रकातून देण्यात आला आहे. दुष्काळाच्या काळात वीजपुरवठा अखंडित ठेवण्यासाठी महावितरणच्या तांत्रिक यंत्रणेने विशेष दक्षता घ्यावी, अशा सूचना देण्यात आल्या आहेत.
