सावदा-लाईव्ह ट्रेंड्स न्यूज प्रतिनिधी । मुक्ताईनगर विधानसभा मतदारसंघाचे आमदार चंद्रकांत भाऊ पाटील यांच्या वाढदिवसानिमित्त त्यांच्या आदेशाने सावदा नगरपालिकेजवळ भव्य महाआरोग्य शिबिराचे आयोजन करण्यात आले. दुष्काळी परिस्थिती आणि शेतकऱ्यांसमोरील अडचणी लक्षात घेऊन वाढदिवसाचा मोठा उत्सव न करता त्याऐवजी जनसेवेच्या माध्यमातून नागरिकांना आरोग्यसेवा देण्याचा उपक्रम राबविण्यात आला. या शिबिराला नागरिकांचा उत्स्फूर्त प्रतिसाद मिळाला असून सुमारे ७० ते ८० नागरिकांची मोतीबिंदू शस्त्रक्रियेसाठी निवड करण्यात आली.
सध्याच्या दुष्काळग्रस्त परिस्थितीत शेतकरी आणि सर्वसामान्य नागरिकांसमोर विविध अडचणी निर्माण झाल्या आहेत. अशा परिस्थितीत वाढदिवसावर अनावश्यक खर्च करण्याऐवजी गरजू नागरिकांना आरोग्यसेवा उपलब्ध करून देण्याचा निर्णय घेण्यात आला. आर्थिक अडचणींमुळे ज्यांचे महत्त्वाचे उपचार रखडले आहेत, अशा नागरिकांना आवश्यक वैद्यकीय मदत मिळावी आणि जास्तीत जास्त नागरिकांना या उपक्रमाचा लाभ व्हावा, हा शिबिराचा प्रमुख उद्देश होता. महाआरोग्य शिबिरात सर्वसाधारण आरोग्य तपासणीसह नेत्र तपासणी, हाडे व सांधे, हृदयरोग, दंतचिकित्सा, कान-नाक-घसा, स्त्रीरोग, बालरोग तसेच विविध प्रकारच्या रक्त तपासण्या करण्यात आल्या. एकाच ठिकाणी विविध आरोग्यविषयक तपासण्या आणि वैद्यकीय मार्गदर्शन उपलब्ध झाल्याने नागरिकांना मोठा दिलासा मिळाला. शिबिरादरम्यान नेत्र तपासणी करण्यात आली असून मोतीबिंदू शस्त्रक्रियेसाठी सुमारे ७० ते ८० रुग्णांची निवड करण्यात आली. संबंधित रुग्णांचे आवश्यक फिटनेस प्रमाणपत्र काढल्यानंतर त्यांच्या मोतीबिंदू शस्त्रक्रियेची व्यवस्था लवकरच करण्यात येणार असल्याची माहिती आयोजकांकडून देण्यात आली.
या उपक्रमासाठी शिवसेना जिल्हाप्रमुख समाधानजी महाजन, श्रीकांतजी शिंदे फाउंडेशनचे जिल्हाप्रमुख पवन सोनवणे, नगरसेवक शाम भाऊ अकोले, सावदा नगरसेवक वेडू लोखंडे, राहुल पाटील, भगवान पाटील, शिवसेना महिला आघाडी प्रमुख सावदा वैशाली पाटील, भाजपचे माजी शहराध्यक्ष जितेंद्र भारंबे, प्रतीक भारंबे, महेश अकोले तसेच राकेश बोराखडे, प्रदीप करोसिया, शुभम लोणारी, भूषण परदेशी, दीपक बडगे यांच्यासह शिवसैनिक आणि शिवसेना पदाधिकारी मोठ्या संख्येने उपस्थित होते. शिबिराच्या यशस्वी आयोजनासाठी डॉक्टर, वैद्यकीय कर्मचारी, स्वयंसेवक तसेच शिवसेना पदाधिकारी आणि कार्यकर्त्यांनी विशेष परिश्रम घेतले. नागरिकांना विविध आरोग्य तपासण्या, आवश्यक वैद्यकीय मार्गदर्शन आणि पुढील उपचाराबाबत माहिती एकाच ठिकाणी मिळाल्याने शिबिराला चांगला प्रतिसाद मिळाला.
