जळगाव-लाईव्ह ट्रेंड्स न्यूज प्रतिनिधी । गोदावरी अभियांत्रिकी महाविद्यालय व पॉलिटेक्निकच्या बेसिक सायन्सेस अँड ह्युमॅनिटीज विभागातर्फे प्राध्यापकांच्या मानसिक आरोग्यासह सर्वांगीण विकासाला चालना देण्यासाठी ‘सुकून – बियॉन्ड द क्लासरूम’ या विशेष फॅकल्टी वेलनेस कार्यशाळेचे आयोजन करण्यात आले. अध्यापनाच्या धावपळीतील ताणतणावातून काही काळ स्वतःसाठी वेळ देत मानसिक शांतता, आत्मजागरूकता आणि सकारात्मक विचारांना प्रोत्साहन देणाऱ्या या उपक्रमाला प्राध्यापकांचा उत्स्फूर्त प्रतिसाद मिळाला.
प्रसिद्ध ‘माइंडफुल एज्युकेटर’ आणि बाल मानसशास्त्रज्ञ सौ. मानसी गगधनी यांनी या विशेष सत्राचे मार्गदर्शन केले. त्यांनी आत्मजागरूकता, मानसिक आरोग्य, विचारांचे व्यवस्थापन तसेच दैनंदिन जीवनातील तणावाचा प्रभावीपणे सामना करण्याच्या विविध पद्धतींबाबत उपस्थित प्राध्यापकांशी संवाद साधला. व्यावसायिक जबाबदाऱ्या पार पाडताना मानसिक संतुलन राखणे आणि स्वतःच्या भावनिक गरजांकडेही लक्ष देणे किती महत्त्वाचे आहे, यावर त्यांनी विशेष भर दिला.
कार्यशाळेदरम्यान सहभागी प्राध्यापकांसाठी ध्यानधारणेचे म्हणजेच मेडिटेशनचे विशेष सत्र घेण्यात आले. मन शांत करण्यासाठी, एकाग्रता वाढविण्यासाठी आणि सकारात्मक ऊर्जा निर्माण करण्यासाठी विविध कृती व उपक्रम राबविण्यात आले. या उपक्रमांमुळे सहभागी प्राध्यापकांना दैनंदिन तणावापासून काही काळ दूर जात स्वतःच्या मानसिक व भावनिक आरोग्याकडे सकारात्मक दृष्टिकोनातून पाहण्याची संधी मिळाली. अध्यापन क्षेत्रात प्राध्यापकांवर शैक्षणिक जबाबदाऱ्यांसोबतच विविध प्रशासकीय आणि विद्यार्थ्यांशी संबंधित जबाबदाऱ्याही असतात. अशा व्यस्त दिनचर्येत स्वतःसाठी वेळ देणे अनेकदा शक्य होत नाही. या पार्श्वभूमीवर ‘सुकून – बियॉन्ड द क्लासरूम’ या उपक्रमातून स्वतःच्या मानसिक आरोग्याची काळजी घेणे, तणावाचे व्यवस्थापन करणे आणि सकारात्मक दृष्टिकोन विकसित करणे याचे महत्त्व अधोरेखित झाले.
प्राध्यापकांची मानसिक सुदृढता ही त्यांच्या वैयक्तिक आयुष्यासोबतच अध्यापनाच्या गुणवत्तेसाठीही महत्त्वाची आहे. शिक्षक मानसिकदृष्ट्या प्रसन्न आणि संतुलित असतील तर त्याचा सकारात्मक परिणाम विद्यार्थ्यांशी संवाद, अध्यापन पद्धती आणि शैक्षणिक वातावरणावरही होऊ शकतो. त्यामुळे अशा वेलनेस उपक्रमांचे सातत्याने आयोजन होणे आवश्यक असल्याचे मत यावेळी उपस्थितांकडून व्यक्त करण्यात आले. कार्यक्रमाचे सूत्रसंचालन व आभार प्रदर्शन प्रा. रेश्मा अट्टारडे यांनी केले. या उपक्रमाच्या यशस्वी आयोजनासाठी कार्यक्रम समन्वयक डॉ. सरोज भोळे, विभागप्रमुख डॉ. नितीन भोळे, अकॅडमिक डीन डॉ. तुषार कोळी तसेच प्राचार्य डॉ. विजयकुमार पाटील यांचे मार्गदर्शन लाभले.
