यावल-लाईव्ह ट्रेंड्स न्यूज प्रतिनिधी । वाढत्या व्यसनाधीनतेमुळे आजच्या युवा पिढीचे आरोग्य, शिक्षण आणि सामाजिक भविष्य धोक्यात येत असल्याच्या पार्श्वभूमीवर विद्यार्थ्यांमध्ये व्यसनमुक्तीची तीव्र जाणीव निर्माण करण्यासाठी एक अत्यंत महत्त्वपूर्ण पाऊल उचलण्यात आले आहे. जळगाव जिल्हा मराठा विद्या प्रसारक मंडळ संचलित, कला, वाणिज्य आणि विज्ञान महाविद्यालय यावल आणि ‘नशाबंदी मंडळ महाराष्ट्र राज्य’ (जिल्हा जळगाव) यांच्यात व्यसनमुक्ती जनजागृती अभियानासाठी विशेष सामंजस्य करार (MoU) करण्यात आला आहे. महाविद्यालयात आयोजित विशेष सभेत हा करार अधिकृतरीत्या मान्य करण्यात आला असून, या माध्यमातून आरोग्यदायी जीवनशैलीचा प्रचार-प्रसार करण्याचा दृढ निर्धार व्यक्त करण्यात आला आहे.
या प्रसंगी उपस्थितांना मार्गदर्शन करताना महाविद्यालयाचे प्राचार्य डॉ. एस. आर. गायकवाड यांनी सांगितले की, आजच्या तीव्र स्पर्धेच्या युगात विद्यार्थ्यांनी कोणत्याही प्रकारच्या व्यसनापासून पूर्णपणे दूर राहून ज्ञान, संस्कार आणि नैतिक सामाजिक मूल्ये जोपासणे काळाची गरज आहे. व्यसनमुक्त तरुणाई हीच सशक्त आणि समृद्ध राष्ट्रनिर्मितीची खरी ताकद असून, शिक्षण संस्थांनी समाजपरिवर्तनाच्या या कार्यात आघाडीची भूमिका बजावली पाहिजे. नशाबंदी मंडळासोबत झालेला हा सामंजस्य करार म्हणजे केवळ कागदपत्री औपचारिकता नसून विद्यार्थ्यांमध्ये सकारात्मक विचार आणि सामाजिक उत्तरदायित्व रुजवण्याचे एक प्रभावी माध्यम ठरेल, असा विश्वास त्यांनी व्यक्त केला.
सभेत नशाबंदी मंडळाचे जळगाव जिल्हा संघटक डॉ. दयाघन राणे यांनी व्यसनामुळे व्यक्ती, कुटुंब आणि संपूर्ण समाजावर होणाऱ्या भीषण दुष्परिणामांची वास्तववादी उदाहरणांसह माहिती दिली. तंबाखू, मद्य आणि इतर घातक अमली पदार्थांपासून दूर राहणे ही प्रत्येक युवाची जबाबदारी असून, विद्यार्थ्यांनी “स्वतः व्यसनमुक्त राहू आणि इतरांनाही व्यसनमुक्त करू” असा पवित्र संकल्प स्वीकारावा, असे आवाहन त्यांनी केले. या कराराच्या अंतर्गत महाविद्यालयात राष्ट्रीय सेवा योजना (NSS), विद्यार्थी विकास विभाग व आजीवन अध्ययन केंद्राच्या संयुक्त विद्यमाने व्यसनमुक्ती रॅली, अमली पदार्थ विरोधी शपथ, तज्ज्ञांची व्याख्याने, समुपदेशन, पोस्टर व घोषवाक्य स्पर्धा आणि पथनाट्यांचे नियमित आयोजन केले जाणार आहे.
या जनजागृती अभियानाच्या नियोजन व यशस्वीतेसाठी महाविद्यालयाचे उपप्राचार्य प्रा. डॉ. एम. डी. खैरनार, उपप्राचार्य प्रा. डॉ. एच. जी. भंगाळे, विद्यार्थी विकास विभागाचे मुख्य कार्यक्रम अधिकारी प्रा. रत्नाकर कोळी, राष्ट्रीय सेवा योजनेचे कार्यक्रम अधिकारी डॉ. पी. व्ही. पावरा आणि प्रा. डॉ. आर. डी. पवार यांच्यासह महाविद्यालयातील सर्व प्राध्यापक व प्राध्यापकेतर कर्मचाऱ्यांचे मोलाचे सहकार्य लाभले.
