दीपनगर-लाईव्ह ट्रेंड्स न्यूज प्रतिनिधी । भुसावळ तालुक्यातील फेकरी गाव परिसरात अज्ञात व्यक्तींकडून वारंवार कुत्रे आणून सोडले जात असल्याचा प्रकार समोर आल्याने ग्रामस्थांमध्ये तीव्र नाराजी व्यक्त होत आहे. गावातील विविध भागांत अचानक नवीन कुत्र्यांची संख्या वाढत असून, त्यामुळे महिला, लहान मुले, ज्येष्ठ नागरिक तसेच दुचाकीस्वारांच्या सुरक्षिततेचा प्रश्न निर्माण झाला आहे.
ग्रामस्थांच्या म्हणण्यानुसार, काही अज्ञात व्यक्ती गावाबाहेरील भागातून कुत्रे आणून फेकरी गावात सोडत असल्याचा संशय आहे. त्यामुळे गेल्या काही दिवसांत गावातील विविध परिसरात भटक्या कुत्र्यांची संख्या वाढताना दिसत आहे. अनेक ठिकाणी ही कुत्री टोळक्याने फिरत असल्याने नागरिकांमध्ये भीतीचे वातावरण निर्माण झाले आहे. दिवसा रस्त्यांवरून जाणाऱ्या नागरिकांच्या मागे कुत्रे धावणे, दुचाकीस्वारांचा पाठलाग करणे तसेच लहान मुलांना घाबरविण्याचे प्रकार घडत असल्याची तक्रार ग्रामस्थांनी केली आहे. विशेषतः दुचाकीस्वारांच्या मागे कुत्र्यांचे टोळके लागल्यास अपघात होण्याची शक्यता असल्याने नागरिक चिंतेत आहेत.
रात्रीच्या वेळी भटक्या कुत्र्यांचा उपद्रव अधिक वाढत असल्याचे ग्रामस्थांचे म्हणणे आहे. टोळक्याने फिरणाऱ्या कुत्र्यांच्या सततच्या भुंकण्यामुळे नागरिकांच्या त्रासात भर पडत असून, रात्रीच्या वेळी घराबाहेर पडणाऱ्या नागरिकांनाही सावधगिरी बाळगावी लागत आहे. गावातील महिला, लहान मुले आणि ज्येष्ठ नागरिकांना या परिस्थितीचा सर्वाधिक त्रास सहन करावा लागत असल्याचे ग्रामस्थांनी सांगितले. अचानक रस्त्यावर येणाऱ्या कुत्र्यांमुळे नागरिकांना घाबरून जाण्याची वेळ येत असून, भविष्यात कुत्र्यांच्या हल्ल्याची गंभीर घटना घडण्यापूर्वी प्रशासनाने योग्य ती उपाययोजना करावी, अशी मागणी होत आहे.
गावाबाहेरील व्यक्तींकडून आपल्याकडील कुत्रे फेकरी गावात आणून सोडले जात असल्याचा संशय ग्रामस्थांकडून व्यक्त केला जात आहे. त्यामुळे अशा प्रकारांना आळा घालण्यासाठी संबंधित यंत्रणेने गावात पाहणी करून भटक्या कुत्र्यांची समस्या सोडविण्यासाठी ठोस उपाययोजना करावी, अशी अपेक्षा ग्रामस्थांनी व्यक्त केली आहे. अज्ञात व्यक्तींकडून कुत्रे सोडण्याचा प्रकार सुरूच राहिल्यास भविष्यात नागरिकांच्या सुरक्षिततेचा गंभीर प्रश्न निर्माण होऊ शकतो. त्यामुळे संबंधित प्रशासनाने या प्रकाराची तातडीने दखल घेऊन भटक्या कुत्र्यांचा बंदोबस्त करण्यासोबतच कुत्रे गावात सोडणाऱ्या व्यक्तींचा शोध घ्यावा, अशी मागणी ग्रामस्थांकडून होत आहे.
