यावल-लाईव्ह ट्रेंड्स न्यूज प्रतिनिधी । यावल तालुक्यातील चुंचाळे ग्रामपंचायत हद्दीतील सार्वजनिक जागेवर करण्यात आलेल्या कथित अतिक्रमणावरून ग्रामपंचायत प्रशासनाच्या कार्यपद्धतीवर प्रश्नचिन्ह उपस्थित झाले आहे. अतिक्रमणधारकाला वारंवार नोटिसा देऊनही प्रत्यक्ष कारवाई करण्यात आली नसल्याचा आरोप करत सरपंच, ग्रामसेवक आणि संबंधित ग्रामपंचायत सदस्याविरोधात नियमानुसार कारवाई करावी तसेच संबंधित सदस्याला अपात्र ठरवावे, अशी मागणी जिल्हाधिकाऱ्यांकडे करण्यात आली आहे.
चुंचाळे येथील आदिवासी सामाजिक कार्यकर्ते मुबारक नवाब तडवी यांनी याबाबत जिल्हाधिकाऱ्यांकडे लेखी तक्रार दाखल केली आहे. तक्रारीनुसार, सार्वजनिक जागेवरील अतिक्रमण काढण्यासाठी 3 एप्रिल 2026 रोजी ग्रामपंचायतीकडे तक्रार करण्यात आली होती. त्यानंतर ग्रामपंचायतीने संबंधित अतिक्रमणधारक हिंतेंद्र रामकृष्ण सोनवणे यांना 6 एप्रिल रोजी महाराष्ट्र ग्रामपंचायत अधिनियमातील संबंधित तरतुदीनुसार 15 दिवसांच्या आत अतिक्रमण काढण्याची नोटीस दिल्याचे तक्रारीत नमूद करण्यात आले आहे.
मात्र नोटीस देऊनही पुढील कारवाई करण्यात आली नसल्याचा आरोप तक्रारदाराने केला आहे. 7 जुलैपर्यंत म्हणजेच जवळपास तीन महिने उलटूनही अतिक्रमण कायम राहिले. उलट 8 जुलै रोजी संबंधित अतिक्रमणधारकाने त्या ठिकाणी पुन्हा बांधकाम सुरू केल्याचे तक्रारीत नमूद करण्यात आले आहे. यानंतर तक्रारदाराने 14 जुलै रोजी पुन्हा लेखी तक्रार दाखल केली. त्यावर ग्रामपंचायत प्रशासनाने दुसरी नोटीस बजावल्याचा दावा करण्यात आला आहे. मात्र दुसरी नोटीस देऊनही प्रत्यक्ष अतिक्रमण हटविण्याची कोणतीही ठोस कारवाई झाली नसल्याचे तक्रारदाराचे म्हणणे आहे. दरम्यान, 19 जुलै रोजी अतिक्रमित जागेवर स्लॅब टाकण्यात आल्याचा आरोपही करण्यात आला आहे.
अतिक्रमणधारकाकडून ग्रामपंचायतीच्या नोटिसांना जुमानले जात नसल्याचे आणि आर्थिक प्रभावाच्या जोरावर प्रशासनावर दबाव असल्याचे आरोप तक्रारीत करण्यात आले आहेत. तसेच संबंधित व्यक्ती नागरिकांना दमदाटी करत असल्याचाही दावा करण्यात आला आहे. मात्र या आरोपांची स्वतंत्र अधिकृत पुष्टी झालेली नसून, त्याबाबत प्रशासनाच्या चौकशीनंतरच वस्तुस्थिती स्पष्ट होऊ शकते. तक्रारीनुसार, अतिक्रमणाची जागा गावाच्या मध्यवर्ती भागात असून पूर्वेस गुरे-ढोरांना पाणी पाजण्यासाठी हौद-कुंड, गावविहीर आणि पाण्याची टाकी, तर पश्चिमेस यावल-नायगाव मुख्य रस्ता असल्याचे नमूद करण्यात आले आहे. या जागेचे छायाचित्र आणि चतु:सीमेची माहितीही तक्रारीसोबत जोडण्यात आल्याचे सांगण्यात आले आहे.
तक्रारदाराच्या मते, ग्रामपंचायत प्रशासनाने केवळ नोटिसा बजावून प्रकरण प्रलंबित ठेवले असल्याने पदाचा गैरवापर आणि कर्तव्यात कसूर झाली आहे का, याची चौकशी होणे गरजेचे आहे. त्यामुळे संबंधित सरपंच आणि ग्रामसेवकांवर नियमानुसार कारवाई करावी, तसेच अतिक्रमण करणाऱ्या संबंधित ग्रामपंचायत सदस्याच्या पदाबाबतही कायदेशीर निर्णय घेऊन त्याला अपात्र ठरवावे, अशी मागणी करण्यात आली आहे. सार्वजनिक जागेवरील अतिक्रमणाचा प्रश्न हा गावाच्या सामूहिक हिताशी संबंधित असल्याने जिल्हा प्रशासनाने या तक्रारीची निष्पक्ष चौकशी करून वस्तुस्थिती समोर आणावी, अशी अपेक्षा व्यक्त होत आहे. अतिक्रमण खरे असल्याचे चौकशीत सिद्ध झाल्यास ते तातडीने हटवून संबंधितांवर नियमानुसार कारवाई होणार का, याकडे आता ग्रामस्थांचे लक्ष लागले आहे.
