जळगाव-लाईव्ह ट्रेंड्स न्यूज प्रतिनिधी । जिल्हा परिषदेच्या मुख्य कार्यकारी अधिकारी करिश्मा नायर यांनी चोपडा तालुक्यातील धानोरा येथील जिल्हा परिषद प्राथमिक शाळा आणि प्राथमिक आरोग्य केंद्राला अचानक भेट देत शिक्षण व आरोग्य व्यवस्थेची प्रत्यक्ष पाहणी केली. विद्यार्थ्यांशी थेट संवाद साधत त्यांनी अभ्यासक्रमातील धडे गिरवून घेतले, निपुण तासिकेचा आढावा घेतला तसेच आरोग्य केंद्रातील सुविधा, स्वच्छता आणि औषधसाठ्याची तपासणी करून संबंधित अधिकाऱ्यांना आवश्यक सूचना दिल्या.
शुक्रवार, दि. १७ जुलै रोजी झालेल्या या भेटीदरम्यान करिश्मा नायर यांनी सर्वप्रथम धानोरा येथील जिल्हा परिषद प्राथमिक शाळेची पाहणी केली. शाळेच्या परिसरातील स्वच्छता, अध्यापनाची गुणवत्ता आणि विद्यार्थ्यांच्या शैक्षणिक प्रगतीची माहिती शिक्षकांकडून जाणून घेतली. त्यानंतर विद्यार्थ्यांशी थेट संवाद साधत त्यांनी अभ्यासक्रमातील विविध धड्यांची उजळणी करून घेतली. विद्यार्थ्यांनी दिलेल्या आत्मविश्वासपूर्ण आणि उत्स्फूर्त प्रतिसादाचे त्यांनी कौतुक केले.
यावेळी जिल्हा परिषद शाळांमध्ये राबविण्यात येणाऱ्या निपुण भारत अभियान अंतर्गत निपुण तासिकेच्या अंमलबजावणीचाही त्यांनी सविस्तर आढावा घेतला. विद्यार्थ्यांच्या भाषा व गणित विषयातील मूलभूत कौशल्यांचा विकास प्रभावीपणे होत असल्याची खात्री करून घेत त्यांनी शिक्षकांशी संवाद साधला. प्रत्येक विद्यार्थ्याच्या शैक्षणिक गुणवत्तेत सातत्याने सुधारणा व्हावी, यासाठी अध्यापन अधिक परिणामकारक करण्याच्या सूचना त्यांनी दिल्या.
यानंतर मुख्य कार्यकारी अधिकारी करिश्मा नायर यांनी धानोरा येथील प्राथमिक आरोग्य केंद्राला भेट देऊन तेथील स्वच्छता, औषधांचा उपलब्ध साठा, रुग्णांना दिल्या जाणाऱ्या सुविधा आणि आरोग्य सेवेच्या गुणवत्तेची तपासणी केली. ग्रामीण भागातील नागरिकांना दर्जेदार व वेळेवर आरोग्य सेवा उपलब्ध होणे ही प्रशासनाची प्राथमिक जबाबदारी असल्याचे सांगत त्यांनी आरोग्य अधिकाऱ्यांना औषधांचा पुरेसा साठा कायम ठेवणे, स्वच्छतेला सर्वोच्च प्राधान्य देणे आणि कोणत्याही परिस्थितीत औषधांची कमतरता भासू न देण्याचे निर्देश दिले.
भेटीदरम्यान त्यांनी शिक्षकांनाही मार्गदर्शन करत विद्यार्थ्यांच्या सर्वांगीण विकासासाठी अधिक सक्रिय भूमिका घेण्याचे आवाहन केले. निपुण भारत अभियानाची प्रभावी अंमलबजावणी करून प्रत्येक विद्यार्थ्याच्या मूलभूत कौशल्यांचा विकास सुनिश्चित करण्यासाठी सातत्याने प्रयत्न करण्याच्या सूचनाही त्यांनी दिल्या.
अचानक केलेल्या या पाहणीमुळे शाळा आणि प्राथमिक आरोग्य केंद्रातील कामकाजाचा प्रत्यक्ष आढावा घेण्याबरोबरच प्रशासनातील उत्तरदायित्व, गुणवत्ता आणि सेवा वितरण अधिक सक्षम करण्यावर भर देण्यात आला. शिक्षण आणि आरोग्य या दोन्ही क्षेत्रांमध्ये दर्जेदार सेवा नागरिकांपर्यंत पोहोचाव्यात, यासाठी अशा अचानक भेटी महत्त्वपूर्ण ठरत असल्याची प्रतिक्रिया स्थानिक स्तरावर व्यक्त होत आहे.
