राष्ट्रवादीत आर्थिक रणनीतीला वेग; पक्षनिधीवरून पार्थ पवारांच्या भूमिकेची चर्चा

मिळालेल्या माहितीनुसार, राष्ट्रवादी काँग्रेसच्या मंत्र्यांना पक्षनिधीसाठी ठराविक रक्कम जमा करण्याबाबत सूचना देण्यात आल्याचे बोलले जात आहे. तसेच काही आमदारांनाही विकासकामांसाठी उपलब्ध करून देण्यात आलेल्या निधीतून काही हिस्सा पक्षाच्या संघटनात्मक कामांसाठी देण्याबाबत निर्देश दिल्याची चर्चा आहे. उपमुख्यमंत्री व अर्थमंत्री अजित पवार यांनी विविध मतदारसंघांसाठी उपलब्ध करून दिलेल्या निधीपैकी काही रक्कम पक्ष संघटनेच्या कामासाठी वापरण्याबाबत अंतर्गत स्तरावर नियोजन केल्याचे सांगितले जात आहे.

पक्षाच्या आर्थिक बळकटीसाठी लोकप्रतिनिधींनी सक्रिय भूमिका घ्यावी, अशी अपेक्षा वरिष्ठ स्तरावर व्यक्त करण्यात आल्याची माहिती आहे. विशेष म्हणजे, पक्षनिधीबाबत दिलेल्या सूचनांचे पालन न झाल्यास संबंधित मंत्र्यांना कठोर संदेश दिला जाऊ शकतो, अशीही चर्चा आहे. काही लोकप्रतिनिधींना आवश्यक असल्यास मंत्रिपदाचा राजीनामाही द्यावा लागू शकतो, अशा स्वरूपाचा इशारा देण्यात आल्याची माहिती सूत्रांनी दिली. मात्र, या संदर्भात राष्ट्रवादी काँग्रेसकडून अद्याप अधिकृत भूमिका स्पष्ट करण्यात आलेली नाही.

दरम्यान, पक्षाच्या आर्थिक आणि संघटनात्मक जबाबदाऱ्यांमध्येही महत्त्वाचे बदल झाल्याची माहिती समोर आली आहे. २९ एप्रिल २०२६ रोजी केंद्रीय निवडणूक आयोगाकडे सादर करण्यात आलेल्या राष्ट्रीय कार्यकारिणीच्या यादीत जबाबदाऱ्यांचे पुनर्वाटप करण्यात आले आहे. राष्ट्रीय अध्यक्षा Sunetra Pawar यांनी आपल्या दोन्ही मुलांना पक्षात महत्त्वाच्या जबाबदाऱ्या दिल्या आहेत. त्यानुसार Parth Pawar यांची राष्ट्रीय महासचिवपदी नियुक्ती करण्यात आली असून, पक्ष समन्वयाची जबाबदारी त्यांच्याकडे देण्यात आली आहे.

तसेच Jay Pawar यांच्याकडे राष्ट्रीय सचिवपदाबरोबरच राष्ट्रीय शिस्तपालन समितीच्या अध्यक्षपदाची जबाबदारी सोपवण्यात आली आहे. पक्षाच्या खजिनदारपदाची धुराही त्यांच्याकडे देण्यात आली आहे. तर अनुभवी पदाधिकारी Shivajirao Garje यांच्याकडे लेखापरीक्षण आणि हिशोबाची जबाबदारी कायम ठेवण्यात आली आहे. या नव्या रचनेमुळे राष्ट्रवादी काँग्रेसच्या संघटनात्मक आणि आर्थिक निर्णय प्रक्रियेत पवार कुटुंबाची भूमिका अधिक प्रभावी झाल्याची चर्चा राजकीय वर्तुळात रंगू लागली आहे.

पक्षाच्या अधिकृत आर्थिक व्यवहारांच्या अधिकारांमध्येही मोठा बदल झाल्याचे स्पष्ट झाले आहे. यापूर्वी राष्ट्रीय अध्यक्ष म्हणून Ajit Pawar, राष्ट्रीय महासचिव व कार्यकारी अध्यक्ष Praful Patel आणि खजिनदार Y. P. Trivedi यांच्याकडे आर्थिक व्यवहारांचे अधिकार होते. मात्र नव्या संरचनेनुसार राष्ट्रीय अध्यक्षा सुनेत्रा पवार, राष्ट्रीय महासचिव पार्थ पवार आणि खजिनदार जय पवार या तिघांकडे पक्षाच्या बँक व्यवहारांसह सर्व अधिकृत आर्थिक निर्णयांचे अधिकार असणार आहेत. नव्या यादीत प्रफुल्ल पटेल आणि वाय. पी. त्रिवेदी यांचा समावेश नसल्याने राष्ट्रवादीच्या आर्थिक व्यवस्थापनाची सूत्रे आता नव्या नेतृत्वाकडे गेल्याचे स्पष्ट झाले आहे.

राज्यातील आगामी राजकीय समीकरणांच्या पार्श्वभूमीवर राष्ट्रवादी काँग्रेसमधील या घडामोडींना विशेष महत्त्व प्राप्त झाले आहे. पक्षाच्या संघटनात्मक विस्तारासाठी आर्थिक तयारीला गती देण्याचा प्रयत्न सुरू असल्याचे दिसत असले, तरी पक्षनिधीबाबत सुरू झालेली ही चर्चा येत्या काही दिवसांत आणखी रंगण्याची शक्यता राजकीय निरीक्षकांकडून व्यक्त केली जात आहे.