जळगाव-लाईव्ह ट्रेंड्स न्यूज प्रतिनिधी । शहर आणि जिल्ह्यात हातगाडीच्या माध्यमातून व्यवसाय करणाऱ्या छोट्या उद्योजकांना आधुनिक व्यवसायाची नवी दिशा देण्यासाठी मराठी प्रतिष्ठानतर्फे “हातगाडी मुक्ती अभियान” सुरू करण्यात येणार आहे. या अभियानाच्या माध्यमातून हातगाडी लोटणाऱ्या व्यावसायिकांचे शारीरिक श्रम कमी करून त्यांचा व्यवसाय अधिक वेगाने वाढविणे आणि आर्थिक उत्पन्नात वाढ घडवून आणण्याचा प्रयत्न केला जाणार असल्याची माहिती मराठी प्रतिष्ठानचे अध्यक्ष ॲड. जमील देशपांडे यांनी दिली.
आजही शहरातील अनेक छोटे उद्योजक आणि फेरीवाले हातगाडीच्या साहाय्याने व्यवसाय करत असून, रोजच्या उदरनिर्वाहासाठी त्यांना प्रचंड मेहनत घ्यावी लागते. उन्हाळ्याची तीव्रता, पावसाळ्यातील अडचणी आणि थंडीच्या वातावरणातही दिवसभर हातगाडी लोटत व्यवसाय करावा लागत असल्याने या व्यावसायिकांना शारीरिक तसेच मानसिक ताणाला सामोरे जावे लागते. अशा कष्टकरी उद्योजकांना सुलभ आणि आधुनिक पर्याय उपलब्ध करून देण्यासाठी मराठी प्रतिष्ठानने पुढाकार घेतल्याचे सांगण्यात आले.
या अभियानांतर्गत पात्र व्यावसायिकांना इलेक्ट्रिक रिक्षा उपलब्ध करून देण्याचे नियोजन करण्यात आले आहे. इलेक्ट्रिक रिक्षामुळे व्यवसाय अधिक वेगाने आणि कमी श्रमात करता येणार असून, कमी वेळेत अधिक ठिकाणी पोहोचण्याची सुविधा मिळणार आहे. त्यामुळे छोट्या उद्योजकांच्या व्यवसाय क्षमतेत वाढ होण्यास मदत होईल, असा विश्वास व्यक्त करण्यात आला आहे.
मराठी प्रतिष्ठानकडून या योजनेसाठी पात्र लाभार्थ्यांना आवश्यक शासकीय सबसिडी मिळवून देण्यासाठीही विशेष प्रयत्न केले जाणार आहेत. शासनाच्या विविध योजनांचा लाभ मिळवून देत आर्थिकदृष्ट्या दुर्बल घटकांतील व्यावसायिकांना सक्षम करण्याचा प्रयत्न या उपक्रमातून होणार असल्याचे ॲड. जमील देशपांडे यांनी स्पष्ट केले.
या अभियानामुळे छोट्या उद्योजकांचे शारीरिक श्रम मोठ्या प्रमाणात कमी होतील, त्यांचा वेळ आणि ऊर्जा वाचेल तसेच व्यवसायातील उत्पन्न वाढण्यास मदत होईल. त्याचबरोबर पर्यावरणपूरक इलेक्ट्रिक वाहनांच्या वापरामुळे शहरात स्वच्छ आणि हरित व्यवसाय संस्कृतीला चालना मिळेल, असेही त्यांनी सांगितले.
“हातगाडी मुक्ती अभियान” अंतर्गत नाव नोंदणी प्रक्रिया २५ मे २०२६ पासून सुरू होणार असून, इच्छुक व्यावसायिकांनी मराठी प्रतिष्ठानच्या गणपती कार्यालयात संपर्क साधावा, असे आवाहन संस्थेकडून करण्यात आले आहे. या उपक्रमामुळे शहरातील कष्टकरी लघुउद्योजकांना आर्थिकदृष्ट्या सक्षम बनविण्यासोबतच त्यांच्या व्यवसायाला आधुनिकतेची जोड मिळणार असल्याची भावना व्यक्त केली जात आहे.
