मुंबई-वृत्तसेवा । आयपीएल 2026 स्पर्धा आता अत्यंत निर्णायक टप्प्यावर पोहोचली असून प्रत्येक सामन्यानंतर गुणतालिकेतील चित्र झपाट्याने बदलताना दिसत आहे. पंजाब किंग्स आणि दिल्ली कॅपिटल्स यांच्यात नुकत्याच झालेल्या थरारक सामन्यानंतर प्लेऑफच्या शर्यतीत मोठी उलथापालथ झाली आहे. काही संघांनी प्लेऑफच्या दिशेने मजबूत पाऊल टाकले असताना काही दिग्गज संघांवर आता ‘करा किंवा मरा’ची वेळ आली आहे. त्यामुळे क्रिकेट चाहत्यांचे लक्ष आता प्रत्येक सामन्याकडे लागले आहे.
रॉयल चॅलेंजर्स बेंगळुरू आणि सनरायझर्स हैदराबाद हे दोन संघ सध्या प्लेऑफच्या उंबरठ्यावर उभे आहेत. सातत्यपूर्ण कामगिरीच्या जोरावर आरसीबीने 95 टक्के पात्रतेची शक्यता निर्माण केली आहे. त्यांना उर्वरित तीन सामन्यांपैकी फक्त एक विजय मिळवायचा आहे. विराट कोहली आणि संघातील फलंदाजांनी योग्य वेळी फॉर्म गाठल्याने आरसीबीचा आत्मविश्वास उंचावला आहे. दुसरीकडे, पॅट कमिन्सच्या नेतृत्वाखालील सनरायझर्स हैदराबादनेही आक्रमक क्रिकेटच्या जोरावर 94 टक्के शक्यता निर्माण केली आहे. त्यांनाही प्लेऑफचे तिकीट निश्चित करण्यासाठी फक्त एका विजयाची आवश्यकता आहे.
गुजरात टायटन्सने हार्दिक पांड्याच्या अनुपस्थितीतही दमदार कामगिरी कायम ठेवत स्वतःचे स्थान मजबूत केले आहे. गुजरातची प्लेऑफमध्ये पोहोचण्याची शक्यता 92 टक्के असून त्यांना उर्वरित तीन सामन्यांपैकी केवळ एक विजय हवा आहे. संघातील गोलंदाज आणि मधल्या फळीतील फलंदाजांनी सातत्य राखल्याने गुजरातचे समीकरण तुलनेने सोपे झाले आहे. मात्र, सर्वाधिक चर्चेत पंजाब किंग्सचा संघ आला आहे. पंजाबने महत्त्वाच्या सामन्यांमध्ये विजय मिळवत 85 टक्के शक्यता निर्माण केली आहे. त्यांना आता पुढील तीन सामन्यांपैकी दोन सामने जिंकणे आवश्यक आहे. पंजाबच्या सध्याच्या फॉर्ममुळे इतर संघांच्या अडचणी वाढल्या आहेत.
चेन्नई सुपर किंग्स आणि राजस्थान रॉयल्ससाठी मात्र परिस्थिती तणावपूर्ण बनली आहे. अनुभवी खेळाडूंनी भरलेला चेन्नईचा संघ अजूनही स्पर्धेत टिकून असला तरी त्यांना पुढील तीन सामन्यांपैकी दोन विजय मिळवणे अत्यावश्यक आहे. त्यांची पात्रतेची शक्यता सध्या 62 टक्के आहे. एक पराभवही त्यांना मोठा धक्का देऊ शकतो. राजस्थान रॉयल्सची परिस्थिती आणखी नाजूक मानली जात आहे. राजस्थानची शक्यता 55 टक्क्यांवर आली असून त्यांनाही दोन सामने जिंकणे गरजेचे आहे. संघाच्या गोलंदाजी आणि मधल्या फळीतील अस्थिर कामगिरीमुळे त्यांच्यावर दबाव वाढला आहे.
दिल्ली कॅपिटल्सने पंजाबविरुद्धचा विजय मिळवत आशा कायम ठेवल्या आहेत. दिल्लीसाठी आता प्रत्येक सामना अंतिम सामन्यासारखा असणार आहे. त्यांना उरलेले दोन्ही सामने जिंकावे लागणार असून त्याचबरोबर नेट रनरेटवरही त्यांचे भवितव्य अवलंबून असेल. दिल्लीची सध्याची पात्रतेची शक्यता 28 टक्के आहे. कोलकाता नाईट रायडर्ससाठी परिस्थिती आणखी कठीण झाली आहे. केकेआरला प्लेऑफमध्ये पोहोचण्यासाठी उर्वरित चारही सामने जिंकणे बंधनकारक आहे. मात्र, इतके करूनही त्यांची शक्यता केवळ 10 टक्के इतकीच राहिली आहे.
दरम्यान, पाच वेळा विजेतेपद पटकावणाऱ्या मुंबई इंडियन्स आणि लखनऊ सुपर जायंट्स यांचे यंदाच्या हंगामातील आव्हान संपुष्टात आले आहे. दोन्ही संघ अधिकृतपणे स्पर्धेतून बाहेर पडले असून त्यांच्या उर्वरित सामन्यांना आता केवळ औपचारिक महत्त्व उरले आहे. विशेषतः मुंबई इंडियन्सच्या खराब कामगिरीमुळे चाहत्यांमध्ये मोठी निराशा पाहायला मिळत आहे.
