जळगाव-लाईव्ह ट्रेंड्स न्यूज प्रतिनिधी । पुणे शहरातील नांदेड सिटी परिसरात सुनेचा निर्घृण खून करून आठ दिवसांपासून फरार असलेल्या आरोपी सासऱ्याला जळगाव स्थानिक गुन्हे शाखेच्या (एलसीबी) पथकाने मेहरूण परिसरातून शिताफीने अटक केली. भानुदास भास्कर चौधरी असे अटक करण्यात आलेल्या आरोपीचे नाव असून, त्याच्याविरोधात पुण्यात खुनाचा गुन्हा दाखल करण्यात आला आहे.
मिळालेल्या माहितीनुसार, २ मे रोजी पुण्यातील नांदेड सिटी परिसरात आरोपी भानुदास चौधरी याने घरगुती वादातून त्याची सून स्वाती तेजस चौधरी हिच्या डोक्यात वार करून तिचा निर्घृण खून केला होता. ही घटना घडल्यानंतर आरोपीने घराला बाहेरून कुलूप लावले आणि तेथून फरार झाला. या घटनेमुळे परिसरात मोठी खळबळ उडाली होती. नांदेड सिटी पोलीस ठाण्यात आरोपीविरोधात खुनाचा गुन्हा दाखल करण्यात आला होता.
खून प्रकरणानंतर पुणे पोलीस आरोपीचा शोध घेत होते. दरम्यान, आरोपी जळगाव शहरातील मेहरूण गाव परिसरात लपून बसल्याची गोपनीय माहिती जळगाव एलसीबीच्या पथकाला मिळाली. माहितीची खातरजमा केल्यानंतर एलसीबीच्या अधिकाऱ्यांनी सापळा रचत मेहरूण येथील महादेव मंदिर परिसरातून आरोपीला ताब्यात घेतले.
एलसीबीच्या या कारवाईमुळे आठ दिवसांपासून फरार असलेल्या आरोपीला अटक करण्यात पोलिसांना यश आले आहे. अटक करण्यात आलेल्या आरोपीला पुढील तपासासाठी पुणे पोलिसांच्या ताब्यात देण्यात आले असून, या प्रकरणाचा अधिक तपास नांदेड सिटी पोलीस करीत आहेत.
