जळगाव-लाईव्ह ट्रेंड्स न्यूज प्रतिनिधी । नागरिकांच्या तक्रारींचे त्वरित निवारण आणि प्रशासनाशी थेट संवाद साधण्यासाठी आयोजित करण्यात येणारा जिल्हास्तरीय लोकशाही दिन सोमवार, ६ एप्रिल रोजी जळगाव जिल्हाधिकारी कार्यालयात पार पडणार आहे. या उपक्रमामुळे नागरिकांना त्यांच्या समस्या मांडण्याचे प्रभावी व्यासपीठ उपलब्ध होणार आहे.
दर महिन्याच्या पहिल्या सोमवारी आयोजित केला जाणारा हा लोकशाही दिन सकाळी १०.३० वाजता जिल्हाधिकारी कार्यालयाच्या अल्पबचत सभागृहात होणार असल्याची माहिती निवासी उपजिल्हाधिकारी वैशाली चव्हाण यांनी दिली आहे. या दिवशी नागरिकांना त्यांच्या वैयक्तिक तक्रारी थेट प्रशासनासमोर मांडण्याची संधी मिळणार आहे.
प्रशासनाने स्पष्ट केले आहे की, ज्या नागरिकांनी यापूर्वी तालुका स्तरावरील लोकशाही दिनात अर्ज केले आहेत आणि त्या अर्जावर एका महिन्याच्या आत कोणतीही कार्यवाही किंवा उत्तर मिळालेले नाही, अशा प्रकरणांनाच जिल्हास्तरीय लोकशाही दिनात प्राधान्य दिले जाणार आहे. त्यामुळे संबंधित नागरिकांनी आवश्यक कागदपत्रांसह उपस्थित राहावे, असे आवाहन करण्यात आले आहे.
नागरिकांचा वेळ, प्रवास खर्च आणि श्रम वाचावेत यासाठी जिल्हा प्रशासनाने अर्ज नोंदणी प्रक्रिया अधिक सुलभ केली आहे. ६ एप्रिल २०२६ पासून पुढील सर्व लोकशाही दिनांसाठी नागरिकांना प्रत्यक्ष जिल्हाधिकारी कार्यालयात येण्याची आवश्यकता राहणार नसून, ऑनलाइन अर्ज सादर करण्याची सुविधा उपलब्ध करून देण्यात आली आहे.
यासाठी नागरिकांनी Jalgaon.gov.in या अधिकृत संकेतस्थळावर जाऊन आपले अर्ज ऑनलाइन नोंदवावेत. प्राप्त अर्ज जिल्हाधिकारी कार्यालयामार्फत संबंधित विभागांना अधिकृत ई-मेलद्वारे पाठविण्यात येणार असून, संबंधित विभागांनी त्यावर कार्यवाही करून अहवाल सादर करणे बंधनकारक करण्यात आले आहे.
प्रशासनाच्या या डिजिटल उपक्रमामुळे नागरिक आणि शासन यांच्यातील संवाद अधिक गतिमान व पारदर्शक होणार असून, तक्रारींचे निवारण जलद गतीने होण्यास मदत होईल, अशी अपेक्षा व्यक्त केली जात आहे.
