जळगाव – लाईव्ह ट्रेंड्स न्यूज प्रतिनिधी | जळगाव महानगरपालिकेच्या महासभेत होणारी अनावश्यक गर्दी आणि त्यातून उद्भवणारे सुरक्षेचे प्रश्न लक्षात घेता, महापौर दीपमाला काळे यांनी एक महत्त्वपूर्ण निर्णय घेतला आहे. आगामी काळात महासभेच्या सभागृहात प्रवेश करण्यासाठी ‘एन्ट्री पास’ बंधनकारक करण्यात आला असून, पासशिवाय कुणालाही प्रवेश दिला जाणार नाही, असे महापौरांनी स्पष्ट केले आहे.
वाढत्या गर्दीमुळे शिस्तीचा प्रश्न:
आज पार पडलेल्या महासभेच्या वेळी सभागृहात नगरसेवकांव्यतिरिक्त मोठ्या संख्येने नागरिक आणि कार्यकर्त्यांनी गर्दी केली होती. अनेकवेळा महत्त्वाच्या विषयांवर चर्चा सुरू असताना या गर्दीमुळे कामकाजात अडथळा निर्माण होतो. तसेच, सभागृहाच्या मर्यादित क्षमतेमुळे गोंधळाची परिस्थिती निर्माण होत असल्याचे दिसून आले. या पार्श्वभूमीवर महासभेचे गांभीर्य आणि शिस्त राखण्यासाठी प्रशासनाने पावले उचलली आहेत.
एन्ट्री पासची सक्ती:
माध्यमांशी बोलताना महापौर दीपमाला काळे म्हणाल्या की, “महासभा ही लोकप्रतिनिधींची चर्चा करण्याची जागा आहे. मात्र, अनेकदा बाहेरील व्यक्तींच्या हस्तक्षेपामुळे कामकाजावर परिणाम होतो. ही बाब गांभीर्याने घेऊन आगामी महासभेपासून मुख्य गेटवरच सुरक्षा रक्षकांमार्फत तपासणी केली जाईल. ज्यांच्याकडे अधिकृत ‘एन्ट्री पास’ असेल, त्यांनाच आत सोडण्यात येईल.”
मुख्य प्रवेशद्वारावरच होणार फिल्टर:
या नवीन नियमानुसार, महापालिकेच्या मुख्य प्रवेशद्वारावरच एक विशेष कक्ष स्थापन केला जाण्याची शक्यता आहे. या ठिकाणी येणाऱ्या अभ्यागतांची नोंदणी करून त्यांना पास दिला जाईल. नगरसेवकांसोबत येणाऱ्या कार्यकर्त्यांच्या संख्येवरही यामुळे मर्यादा येणार आहे. महापालिकेच्या या निर्णयामुळे सभागृहातील गोंधळ कमी होऊन कामकाजात पारदर्शकता आणि सुसूत्रता येईल, अशी अपेक्षा व्यक्त केली जात आहे.
आजच्या महासभेत राहुल शिरसाळे यांच्यासह अन्य नागरिकांच्या उपस्थितीनंतर महापौरांनी ही भूमिका मांडली आहे. महापालिकेच्या या शिस्तप्रिय निर्णयाचे काही स्तरातून स्वागत होत आहे, तर राजकीय कार्यकर्त्यांमध्ये याची चर्चा रंगली आहे.
