जळगाव-लाईव्ह ट्रेंडस न्यूज प्रतिनिधी । जळगाव शहरापासून जवळ असलेल्या कुसुंबा गावाजवळ शनिवारी २८ मार्च रोजी सकाळी १० वाजता झालेल्या एका भीषण रस्ते अपघातात ७० वर्षीय वृद्ध महिलेचा मृत्यू झाल्याची धक्कादायक घटना घडली आहे. याबाबत दुपारी २ वाजता एमआयडीसी पोलीस ठाण्यात अकस्मात मृत्यूची नोंद करण्यात आली. विमलबाई रुपचंद पाटील (वय ७०, रा. कुसुंबा, ता. जि. जळगाव) असे मृत महिलेचे नाव आहे.
याबाबत अधिक माहिती अशी की, जळगाव शहरापासून जवळ असलेल्या कुसुंबा गावात विमलबाई रूपचंद पाटील ह्या आपल्या कुटुंबियांसह वास्तव्याला होत्या. शनिवारी, २८ मार्च रोजी सकाळी १० वाजेच्या सुमारास कुसुंबा गावाजवळून जात होत्या. रस्ता ओलांडत असताना किंवा रस्त्याच्या कडेने जात असताना त्यांना एका अज्ञात वाहनाने जोरदार धडक दिली. हा अपघात इतका भीषण होता की विमलबाई गंभीररीत्या जखमी होऊन रस्त्यावर कोसळल्या. अपघातानंतर परिसरातील नागरिकांनी मदतीसाठी धाव घेतली.
स्थानिक नागरिक सुरेश पाटील यांनी तत्परता दाखवत जखमी विमलबाईंना उपचारासाठी तातडीने जळगाव येथील शासकीय जिल्हा रुग्णालयात दाखल केले. मात्र, रुग्णालयात पोहोचण्यापूर्वीच त्यांची प्राणज्योत मालवली होती. जिल्हा रुग्णालयातील वैद्यकीय अधिकार्यांनी त्यांची तपासणी करून त्यांना ‘मृत’ घोषित केले. या घटनेबाबत एमआयडीसी पोलीस ठाण्यात अकस्मात मृत्यूची नोंद करण्यात आली. पुढील तपास पोहेकॉ गफार तडवी हे करीत आहे.
