चाळीसगाव-लाईव्ह ट्रेंडस न्यूज प्रतिनिधी । चाळीसगाव शहरात गुन्हेगारी प्रवृत्तीने पुन्हा एकदा डोके वर काढले असून, हनुमानवाडी परिसरात गावठी कट्ट्यातून झालेल्या गोळीबारात एक तरुण गंभीर जखमी झाला आहे. मंगळवार, १७ मार्च रोजी दुपारी घडलेल्या या धक्कादायक घटनेमुळे संपूर्ण शहरात भीतीचे आणि खळबळजनक वातावरण पसरले आहे.
मिळालेल्या माहितीनुसार, चाळीसगावमधील हनुमानवाडी येथील एका पत्र्याच्या शेडमध्ये अंकित महेंद्र मोरे, मेहुल रत्नपाल मोरे, कृष्णा जिभाऊ झाल्टे आणि इतर दोन अज्ञात व्यक्ती एकत्र जमले होते. यावेळी या तरुणांकडे दोन गावठी कट्टे (बेकायदेशीर शस्त्रे) होती. हे तरुण एकमेकांना कट्टा दाखवत असताना, त्यातील एका अज्ञात व्यक्तीने कट्टा सिकंदर शेख निसार शेख यांच्या दिशेने रोखला. खेळत असताना किंवा धाक दाखवण्याच्या नादात अचानक खटका (Trigger) दबला गेला आणि कट्ट्यातून गोळी सुटली.
तरुण गंभीर जखमी :
दुर्दैवाने ही गोळी थेट सिकंदर शेख यांच्या खांद्यात घुसली. गोळी लागताच सिकंदर रक्ताच्या थारोळ्यात कोसळला. त्यांना तातडीने शहरातील एका खाजगी रुग्णालयात दाखल करण्यात आले आहे. घटनेची माहिती मिळताच परिसरात बघ्यांची मोठी गर्दी जमली होती.
पोलिसांचा तपासाचा चक्राकार वेग:
या गंभीर घटनेची दखल चाळीसगाव शहर पोलिसांनी घेतली असून, याप्रकरणी पाच जणांविरुद्ध गुन्हा दाखल करण्यात आला आहे. गुन्ह्यातील गांभीर्य ओळखून पोलिसांनी आरोपींच्या शोधासाठी तातडीने दोन विशेष पथके तयार केली असून, ही पथके वेगवेगळ्या ठिकाणी रवाना झाली आहेत. याबाबत चाळीसगाव शहर पोलीस ठाण्यात गुन्हा दाखल करण्यात आला आहे.
