नवी दिल्ली-वृत्तसेवा | इराणवर इस्रायल आणि अमेरिकेच्या हल्ल्याच्या पार्श्वभूमीवर इस्रायलने आपली हवाई हद्द तात्पुरती बंद केली असून त्याचा परिणाम भारतासह अनेक देशांच्या विमानसेवेवर झाला आहे. या परिस्थितीत एअर इंडियाचे दिल्ली–तेल अवीव उड्डाण मुंबईकडे वळवण्यात आले आहे.
एअर इंडियाने दिलेल्या माहितीनुसार, 28 फेब्रुवारी रोजी दिल्लीहून तेल अवीवकडे निघालेले AI139 हे उड्डाण इस्रायलमध्ये हवाई हद्द बंद झाल्यामुळे आणि प्रवासी व कर्मचाऱ्यांच्या सुरक्षिततेच्या दृष्टीने भारतात परत आणण्यात आले. हे विमान मुंबई विमानतळावर उतरवण्यात आले. या अचानक बदलामुळे प्रवाशांना झालेल्या गैरसोयीबद्दल एअर इंडियाने खेद व्यक्त केला आहे. अधिक माहितीसाठी एअर इंडियाने +91 1169329333 आणि +91 1169329999 हे हेल्पलाईन क्रमांक जाहीर केले आहेत.
दरम्यान, एअर इंडियासोबतच इंडिगोनेही मध्यपूर्वेतील काही उड्डाणे तात्पुरती स्थगित केली आहेत. एअर इंडियाने स्पष्ट केले की, ते परिस्थितीवर सातत्याने लक्ष ठेवून असून सुरक्षिततेच्या दृष्टीने आवश्यक ते बदल केले जातील.
फ्लाइट ट्रॅकिंग वेबसाइट Flightradar24 वर उपलब्ध माहितीनुसार, बोइंग 777 या विमानाने चालवलेले हे उड्डाण सुमारे पाच तास हवेत होते. सौदी अरेबियाच्या हवाई हद्दीत प्रवेश केल्यानंतर विमान परत फिरवण्याचा निर्णय घेण्यात आला.
दरम्यान, इस्रायलने इराणची राजधानी तेहरान तसेच इतर शहरांवर हल्ले केल्याची माहिती समोर आली आहे. शनिवारी सकाळी तेहरानसह विविध भागांत स्फोटांचे आवाज ऐकू आले असून हवाई हल्ल्यांचे सायरन वाजत असल्याचे वृत्त आहे. प्रत्युत्तरादाखल इराणने इस्रायलवर क्षेपणास्त्र हल्ले सुरू केले असून सुमारे 400 क्षेपणास्त्रे डागल्याची माहिती काही मीडिया अहवालांतून देण्यात आली आहे.
या पार्श्वभूमीवर भारत सरकारने इराण आणि इस्रायलमध्ये वास्तव्यास असलेल्या भारतीय नागरिकांना अत्यंत सावधगिरी बाळगण्याचा सल्ला दिला आहे. अमेरिकेचे अध्यक्ष Donald Trump यांनी इराणविरोधात मोठ्या लष्करी कारवाईची घोषणा केल्यानंतर ही अॅडव्हायझरी जारी करण्यात आली.
इराणमधील भारतीय दूतावासाने तेथील भारतीयांना अनावश्यक हालचाली टाळून सुरक्षित ठिकाणी राहण्याचे आवाहन केले आहे. अधिकृत आकडेवारीनुसार, इराणमध्ये विद्यार्थ्यांसह सुमारे 10 हजारांहून अधिक भारतीय राहतात, तर इस्रायलमध्ये 41 हजारांहून अधिक भारतीय वास्तव्यास आहेत.
सध्याच्या तणावपूर्ण परिस्थितीत मध्यपूर्वेतील घडामोडींवर संपूर्ण जगाचे लक्ष लागले असून पुढील काही दिवस अत्यंत महत्त्वाचे ठरणार आहेत.
