मुंबई-वृत्तसेवा | बारामती विधानसभा मतदारसंघात लवकरच पोटनिवडणूक होण्याची शक्यता निर्माण झाली असून, त्यासाठी निवडणूक प्रक्रियेच्या हालचालींना वेग आला आहे. भारतीय निवडणूक आयोग यांनी या मतदारसंघासाठी विशेष संक्षिप्त मतदारयादी पुनरीक्षण कार्यक्रम जाहीर केला आहे. 1 जानेवारी 2026 पर्यंत नाव नोंदविलेल्या मतदारांना या पोटनिवडणुकीत मतदानाचा अधिकार असणार आहे. 10 मार्च रोजी अंतिम मतदारयादी प्रसिद्ध होणार असून, त्यानंतर कोणत्याही क्षणी निवडणुकीची अधिकृत घोषणा होण्याची शक्यता वर्तवली जात आहे.
दरम्यान, या पोटनिवडणुकीसाठी उमेदवारीबाबत महत्त्वाची राजकीय हालचाल समोर आली आहे. राज्याच्या उपमुख्यमंत्री सुनेत्रा पवार या बारामती विधानसभा मतदारसंघातून निवडणूक लढवण्याची शक्यता असल्याची माहिती राष्ट्रवादी काँग्रेसमधील सूत्रांनी दिली आहे. राष्ट्रवादी काँग्रेस पक्षाच्या कोअर कमिटीच्या बैठकीत त्यांच्या नावावर एकमत झाल्याचे समजते. तसेच ही निवडणूक शक्यतो बिनविरोध व्हावी, यासाठी पक्ष प्रयत्नशील असल्याचीही माहिती आहे.
याच बैठकीत आगामी राज्यसभा निवडणुकीबाबतही महत्त्वाचा निर्णय घेण्यात आला. पक्षाने पार्थ पवार यांना राज्यसभेची उमेदवारी देण्याचा निर्णय घेतल्याचे सांगितले जात आहे. मुंबईत प्रफुल पटेल यांच्या निवासस्थानी झालेल्या बैठकीत हा निर्णय घेण्यात आला. बैठकीला पक्षाचे प्रदेशाध्यक्ष सुनील तटकरे यांच्यासह कोअर कमिटीचे सदस्य उपस्थित होते.
तसेच येत्या काही दिवसांत वरळी डोम येथे पक्षाच्या राष्ट्रीय कार्यकारिणीची बैठक होणार असून, त्यामध्ये पक्षाच्या राष्ट्रीय अध्यक्षपदाबाबत महत्त्वाचा निर्णय होण्याची शक्यता व्यक्त केली जात आहे. या पार्श्वभूमीवर पक्ष संघटनेत मोठे बदल होण्याची चिन्हे दिसत आहेत.
दरम्यान, उपमुख्यमंत्री सुनेत्रा पवार यांनी अलीकडेच पद व गोपनीयतेची शपथ घेतली आहे. राजभवन मुंबई येथे झालेल्या शपथविधी सोहळ्यात राज्यपालांनी त्यांना शपथ दिली. त्यांच्या शपथविधीनंतर बारामतीसह राज्याच्या राजकारणात नव्या समीकरणांची चर्चा सुरू झाली आहे.
भारतीय संविधानाच्या कलम 164(4) नुसार, एखादी व्यक्ती विधिमंडळाची सदस्य नसतानाही मंत्री किंवा उपमुख्यमंत्री होऊ शकते. मात्र शपथ घेतल्यानंतर सहा महिन्यांच्या आत त्या व्यक्तीने विधानसभा किंवा विधान परिषदेचे सदस्य होणे बंधनकारक असते. अन्यथा पदाचा राजीनामा द्यावा लागतो. या पार्श्वभूमीवर बारामती पोटनिवडणूक सुनेत्रा पवार यांच्यासाठी महत्त्वाची मानली जात आहे.
बारामती पोटनिवडणूक, राज्यसभा उमेदवारी आणि पक्ष संघटनेतील संभाव्य बदल या सर्व घडामोडींमुळे राज्याच्या राजकारणात चांगलीच चुरस निर्माण झाली आहे. राष्ट्रवादी काँग्रेसकडून ही निवडणूक बिनविरोध करण्याचा प्रयत्न होत असला, तरी विरोधकांची भूमिका काय असेल, याकडे सर्वांचे लक्ष लागले आहे. आगामी काही दिवसांत निवडणूक आयोगाची अधिकृत घोषणा झाल्यानंतर बारामतीतील राजकीय वातावरण अधिक तापण्याची शक्यता आहे.
