जळगाव -लाईव्ह ट्रेंड्स न्यूज प्रतिनिधी । चेन्नई–एकतानगर सुपरफास्ट एक्सप्रेसमध्ये गुन्हेगारी प्रतिबंधक कारवाईदरम्यान संशयास्पद हालचालीवर लक्ष ठेवून आरपीएफ आणि जीआरपीच्या पथकाने एका आरोपीला अटक करत मोठी चोरी उघडकीस आणली. दुधनी स्थानकावर पहाटेच्या सुमारास घडलेल्या या घटनेत अंदाजे १.५२ लाख रुपयांचा मुद्देमाल जप्त करण्यात आला आहे.
ट्रेन क्रमांक २०९१९ दिनांक १७ जानेवारी २०२६ रोजी धावणाऱ्या Ekta Nagar Superfast Express वर गुन्हेगारी प्रतिबंधक कर्तव्यावर एक सहाय्यक उपनिरीक्षक, चार आरपीएफ कर्मचारी आणि दोन जीआरपी कर्मचारी अशा संयुक्त पथकाची नियुक्ती करण्यात आली होती. पहाटे सुमारे ५:३० वाजता गाडी दुधनी स्थानकात असताना एक संशयित व्यक्ती आरक्षित डब्यातून जनरल डब्याकडे धावताना दिसली. पथकाने तत्काळ त्याला अडवून चौकशी केली.
चौकशीत आरोपीने आपले नाव गोपीकृष्ण (रा. बेल्लारी जिल्हा, कर्नाटक) असे सांगितले आणि तीन मोबाईल फोन तसेच ५,१०० रुपयांची रोकड चोरी केल्याची कबुली दिली. त्याच्या झडतीत अंदाजे १.५२ लाख रुपयांच्या किमतीचे मोबाईल फोन (आय-फोनसह), मनगटी घड्याळ, पॉवर बँक, चार्जर आणि इअरफोन्स असा चोरीचा मुद्देमाल आढळून आला. प्रवाशांच्या तक्रारींनुसार हा मुद्देमाल जप्त करण्यात आला आहे.
अटक करण्यात आलेल्या आरोपीला पुढील कारवाईसाठी Government Railway Police/सोलापूर यांच्या ताब्यात देण्यात आले. भारतीय रेल्वे कायद्याच्या कलम ३०५, ३०५(सी) आणि १४७ अंतर्गत एसीआर क्रमांक ०२/२०२६ नुसार गुन्हा दाखल करण्यात आला असून पुढील तपास सुरू आहे.
मध्य रेल्वे प्रशासनाने या कारवाईचे कौतुक करत प्रवाशांच्या सुरक्षेसाठी आरपीएफ आणि जीआरपीच्या समन्वित प्रयत्नांवर भर दिला आहे. प्रवाशांनी प्रवासादरम्यान सतर्क राहावे, संशयास्पद हालचाली दिसल्यास तत्काळ रेल्वे अधिकाऱ्यांना माहिती द्यावी किंवा मदतीसाठी १३९ या हेल्पलाईन क्रमांकावर संपर्क साधावा, असे आवाहन करण्यात आले आहे.
