फैजपूर-लाईव्ह ट्रेंड्स न्यूज प्रतिनिधी । फैजपूर शहरातील सार्वजनिक ठिकाणी राष्ट्रीय महापुरुष, धार्मिक व्यक्ती किंवा राजकीय नेत्यांचे बॅनर-पोस्टर लावण्यापूर्वी नगरपरिषद व पोलीस प्रशासनाची पूर्वपरवानगी सक्तीची करण्यात यावी, अशी मागणी करण्यात आली आहे. शहरातील वाढत्या अनधिकृत फलकांमुळे कायदा-सुव्यवस्थेचा प्रश्न निर्माण होण्याची शक्यता व्यक्त करत प्रशासनाला लेखी निवेदन सादर करण्यात आले.
माजी उपनगराध्यक्ष शेख कुर्बान शेख करीम यांच्या मार्फत फैजपूर नगरपरिषद येथील मुख्याधिकारी तसेच फैजपूर पोलीस स्टेशन येथील पोलीस निरीक्षक यांना हे निवेदन देण्यात आले. शहरातील विविध चौक, रस्ते आणि सार्वजनिक स्थळांवर परवानगी न घेता बॅनर व फलक लावले जात असल्याने भविष्यात वाद निर्माण होण्याची भीती व्यक्त करण्यात आली आहे.
निवेदनात नमूद केल्याप्रमाणे, धार्मिक किंवा राष्ट्रीय महापुरुषांच्या नावावर लावण्यात येणारे अनधिकृत बॅनर समाजात गैरसमज, तणाव किंवा वाद-विवादाला कारणीभूत ठरू शकतात. त्यामुळे अशा फलकांवर नियंत्रण ठेवण्यासाठी स्पष्ट नियमावली तयार करून पूर्वपरवानगीची अट कडकपणे लागू करावी, तसेच अनधिकृत बॅनर तात्काळ हटवावेत, अशी मागणी करण्यात आली आहे.
शहरातील सामाजिक सलोखा आणि शांतता अबाधित राखणे ही प्रशासनाची जबाबदारी असल्याचे नमूद करत, नगरपरिषद आणि पोलीस प्रशासनाने संयुक्तपणे कारवाई करावी, अशी विनंती करण्यात आली आहे. भविष्यात कोणताही कायदा-सुव्यवस्थेचा प्रश्न निर्माण होऊ नये यासाठी प्रतिबंधात्मक उपाययोजना राबविण्याची आवश्यकता अधोरेखित करण्यात आली.
दरम्यान, या निवेदनाची दखल घेऊन प्रशासन योग्य ती कार्यवाही करेल, अशी अपेक्षा व्यक्त होत आहे. शहरात सुयोग्य नियमन व पारदर्शक प्रक्रिया राबविल्यास अनधिकृत फलकांमुळे होणारे वाद टाळता येतील, असा विश्वास व्यक्त करण्यात आला आहे.
