भुसावळ-लाईव्ह ट्रेंड्स न्यूज प्रतिनिधी । ट्रान्सजेंडर अभ्यास आणि सामाजिक कार्य क्षेत्रात उल्लेखनीय व प्रेरणादायी योगदान देणारे भुसावळ, महाराष्ट्र येथील पारलिंगी सामाजिक कार्यकर्ता चाँद जयबून बी. सरवर तडवी यांना मानद डॉक्टरेट (Honorary Doctorate Award) प्रदान करून गौरविण्यात आले आहे. हा सन्मान नालंदा NIRC युनिव्हर्सिटी (Global Honorary Research Institution), पंजाब यांच्या वतीने दिनांक २५ डिसेंबर २०२५ रोजी पुणे येथे आयोजित विशेष कार्यक्रमात देण्यात आला.
डॉ. चाँद तडवी यांनी ट्रान्सजेंडर समुदायाच्या सांस्कृतिक परंपरा, सामाजिक ओळख, बदलते वास्तव आणि समकालीन प्रश्नांवर सखोल अभ्यासपूर्ण कार्य केले आहे. त्यांच्या संशोधनातून तसेच प्रत्यक्ष सामाजिक कार्यातून ट्रान्सजेंडर समुदायाच्या समस्या, आव्हाने आणि हक्क यांना समाजासमोर मांडण्याचे महत्त्वपूर्ण कार्य त्यांनी केले आहे. या क्षेत्रातील त्यांचे सातत्यपूर्ण योगदान आणि समर्पित सेवाभावाची दखल घेऊनच हा मानद सन्मान प्रदान करण्यात आला आहे.
नालंदा NIRC युनिव्हर्सिटीच्या वतीने स्पष्ट करण्यात आले की, सामाजिक क्षेत्रात उत्कृष्ट कार्य करणाऱ्या व्यक्तींना प्रोत्साहन देणे आणि त्यांच्या कार्याचा गौरव करणे, हा या मानद डॉक्टरेट पुरस्काराचा मुख्य उद्देश आहे. समाजहितासाठी केलेली निस्वार्थ सेवा, संशोधनात्मक दृष्टिकोन आणि सामाजिक परिवर्तनासाठी दिलेले योगदान या निकषांवर डॉ. तडवी यांची निवड करण्यात आली.
हा सन्मान मिळाल्यानंतर सामाजिक, शैक्षणिक आणि स्वयंसेवी क्षेत्रातून मोठ्या प्रमाणावर अभिनंदनाचा वर्षाव होत आहे. या पुरस्कारामुळे ट्रान्सजेंडर अभ्यास व सामाजिक कार्य क्षेत्रात कार्यरत असलेल्या संशोधक, कार्यकर्ते आणि विविध सामाजिक संघटनांना नवी दिशा आणि प्रेरणा मिळेल, अशी प्रतिक्रिया व्यक्त होत आहे.
डॉ. चाँद तडवी यांच्या या सन्मानामुळे ट्रान्सजेंडर समुदायाच्या हक्क, अस्मिता आणि सामाजिक न्यायासाठी सुरू असलेल्या लढ्याला अधिक बळ मिळेल, असा विश्वास सामाजिक कार्यकर्ते आणि समुदाय प्रतिनिधींनी व्यक्त केला आहे. त्यांच्या कार्यामुळे समाजात समावेशकतेची भावना अधिक दृढ होईल, अशी अपेक्षाही व्यक्त करण्यात येत आहे.
एकूणच, भुसावळच्या चाँद जयबून बी. सरवर तडवी यांना मिळालेली मानद डॉक्टरेट ही केवळ वैयक्तिक सन्मान नसून, ट्रान्सजेंडर समुदायाच्या सामाजिक मान्यतेकडे नेणारा एक महत्त्वाचा टप्पा ठरला आहे.
