जकार्ता-लाईव्ह ट्रेंड्स न्यूज वृत्तसेवा। आंतरराष्ट्रीय क्रिकेटच्या इतिहासात क्वचितच पाहायला मिळणारा क्षण इंडोनेशियाच्या क्रिकेट संघाकडून घडला असून, वेगवान गोलंदाज गेडे प्रियंदना याने आपल्या T20I पदार्पणातच जागतिक विक्रमाची नोंद केली आहे. कंबोडियाविरुद्ध खेळल्या गेलेल्या सामन्यात प्रियंदनाने पहिल्याच षटकात पाच विकेट्स घेत सामना अक्षरशः एकहाती फिरवला आणि आंतरराष्ट्रीय टी-२० क्रिकेटमध्ये नवा इतिहास घडवला.
इंडोनेशिया आणि कंबोडिया यांच्यातील हा सामना अखेरच्या टप्प्यात अत्यंत चुरशीचा बनला होता. कंबोडियाला शेवटच्या पाच षटकांत विजयासाठी ६२ धावांची गरज होती आणि त्यांच्या हातात पाच विकेट्स शिल्लक होत्या. अशा निर्णायक क्षणी इंडोनेशियाच्या कर्णधाराने चेंडू पदार्पण करणाऱ्या गेडे प्रियंदनाकडे सोपवला आणि याच निर्णयाने सामन्याचं चित्र पालटलं.
प्रियंदनाने आपल्या पहिल्याच षटकात पहिल्या तीन चेंडूंवर शाह अबरार हुसैन, निर्मलजीत सिंग आणि चांथिओन रत्नक यांना बाद करत शानदार हॅट्रिक पूर्ण केली. त्यानंतर एक डॉट बॉल टाकत दबाव कायम ठेवला. पुढील चेंडूवर मोंगदारा सोक याला बाद केले. एक वाइड चेंडू टाकल्यानंतर शेवटच्या चेंडूवर पेल वेनाक याला तंबूत पाठवत प्रियंदनाने एका षटकात पाच विकेट्स घेण्याचा अविश्वसनीय पराक्रम साकारला.
या ऐतिहासिक षटकानंतर कंबोडियाचा संपूर्ण संघ १०७ धावांवर गारद झाला आणि इंडोनेशियाने हा सामना तब्बल ६० धावांनी जिंकला. विशेष म्हणजे, आंतरराष्ट्रीय पुरुष किंवा महिला टी-२० क्रिकेटमध्ये एका षटकात पाच विकेट्स घेणारा गेडे प्रियंदना हा पहिलाच गोलंदाज ठरला आहे, ज्यामुळे त्याचं नाव क्रिकेट इतिहासात सुवर्णाक्षरांनी कोरलं गेलं आहे.
एकूण टी-२० क्रिकेटचा विचार करता, एका षटकात पाच विकेट्स घेणारा गेडे प्रियंदना हा तिसरा गोलंदाज ठरतो. याआधी अमीन हुसैन आणि भारताचा अभिमन्यू मिथुन यांनी हा पराक्रम केला होता. अमीन हुसैन याने २०१३-१४ च्या विक्ट्री डे टी-२० कपमध्ये यूसीबी–बीसीबी इलेव्हनकडून खेळताना अबाहानी लिमिटेडविरुद्ध ही कामगिरी केली होती, तर अभिमन्यू मिथुन याने २०१९-२० साली सैयद मुश्ताक अली ट्रॉफीमध्ये कर्नाटककडून खेळताना हरियाणाविरुद्ध एका षटकात पाच विकेट्स घेतल्या होत्या.
आंतरराष्ट्रीय क्रिकेटमध्ये आतापर्यंत एका षटकात चार विकेट्स घेण्याच्या घटना १४ वेळा घडल्या आहेत, मात्र एका षटकात पाच विकेट्स घेण्याची ही पहिलीच वेळ आहे. त्यामुळे गेडे प्रियंदनाची कामगिरी केवळ सामना जिंकणारी नव्हे, तर क्रिकेट इतिहासाला नवी दिशा देणारी ठरली आहे.
एकूणच, T20I पदार्पणातच गेडे प्रियंदनाने केलेला हा विक्रम क्रिकेटविश्वासाठी ऐतिहासिक क्षण ठरला असून, भविष्यातील आंतरराष्ट्रीय क्रिकेटमध्ये त्याच्याकडून मोठ्या अपेक्षा व्यक्त केल्या जात आहेत.
