अमळनेर–लाईव्ह ट्रेंड्स न्यूज प्रतिनिधी । शहरात पोलिस दिन (२ जानेवारी) आणि पत्रकार दिन (६ जानेवारी) या दोन महत्त्वपूर्ण दिवसांचे औचित्य साधत पोलिस विभाग आणि महाराष्ट्र राज्य पत्रकार संघाच्या संयुक्त विद्यमाने भव्य क्रीडा व सांस्कृतिक कार्यक्रमांचे आयोजन करण्यात आले आहे. सामाजिक बांधिलकी, परस्पर सहकार्य आणि आपुलकीची भावना वृद्धिंगत करण्याचा उद्देश या उपक्रमाच्या केंद्रस्थानी असून, शहरात या कार्यक्रमांविषयी उत्सुकता निर्माण झाली आहे.
या उपक्रमांत विद्यार्थ्यांसाठी निबंध स्पर्धा, महिलांसाठी संगीत खुर्ची आणि लिंबू-चमचा स्पर्धा, तसेच पोलिस आणि पत्रकार संघातील सदस्यांसाठी मैत्रीपूर्ण क्रिकेट सामना यांचा समावेश करण्यात आला आहे. दोन भिन्न क्षेत्रातील घटकांना एकाच व्यासपीठावर आणून संवाद, सलोखा आणि आपसी सहयोग वाढवण्याचा सुंदर प्रयत्न आयोजकांनी केला आहे. याशिवाय शहरातील विविध क्षेत्रांत उल्लेखनीय योगदान देणाऱ्या मान्यवरांचा सत्कार करण्याचा कार्यक्रमही उत्साहात होणार आहे.
२ जानेवारी रोजी पोलिस आणि पत्रकार संघातील सदस्यांमध्ये मैत्रीपूर्ण क्रिकेट स्पर्धा रंगणार असून दोन्हीकडून उत्स्फूर्त प्रतिसाद मिळण्याची अपेक्षा आयोजकांनी व्यक्त केली आहे. या स्पर्धेमुळे दोन्ही क्षेत्रांतील बांधिलकी अधिक दृढ होईल, असा विश्वासही व्यक्त करण्यात आला आहे. तर ६ जानेवारी रोजी निबंध स्पर्धा, महिलांसाठी मनोरंजक स्पर्धा तसेच पुरस्कार वितरण सोहळा पार पडणार आहे. मान्यवरांचा सत्कार, विजेत्यांचा गौरव आणि कार्यक्रमाची सांगता या दिवसाच्या प्रमुख आकर्षणांत गणली जात आहे.
या उपक्रमामुळे पोलिस व पत्रकार कुटुंबीयांमधील आपुलकी वाढण्याबरोबरच शहरातील नागरिकांनाही एक सकारात्मक संदेश मिळणार आहे. सामाजिक ऐक्य, सहकार्य आणि आपुलकी मजबुत करणाऱ्या या कार्यक्रमांना मोठ्या प्रमाणावर प्रतिसाद मिळेल, अशी अपेक्षा आयोजकांनी व्यक्त केली आहे.
