जळगाव – लाईव्ह ट्रेंड्स न्यूज प्रतिनिधी । जळगावच्या कन्या खेळाडूंनी राज्यस्तरावर आपले वर्चस्व सिद्ध करण्याचा धडाका कायम ठेवला आहे. रत्नागिरी येथे पार पडलेल्या ३५व्या महाराष्ट्र राज्य ज्युनिअर कुमार गट अजिंक्यपद तायक्वांडो स्पर्धेत जळगावची देवयानी भिला पाटील हिने उत्कृष्ट कामगिरी करत कांस्यपदक पटकावले आहे. तिच्या या यशामुळे जळगाव जिल्हा तायक्वांडो असोसिएशन आणि जैन स्पोर्टस् अकॅडमीचा मान उंचावला आहे.
दिनांक २३ ते २५ ऑक्टोबरदरम्यान रत्नागिरी येथे ही स्पर्धा रंगली होती. या स्पर्धेत देवयानीने मुलींच्या ४४ किलो वजन गटात दमदार खेळ सादर करत प्रतिस्पर्ध्यांना चांगलीच टक्कर दिली. अखेरच्या फेरीत झुंजार लढत देत तिने कांस्यपदकावर आपले नाव कोरले. विशेष म्हणजे, नुकत्याच झालेल्या शालेय राज्यस्तरीय तायक्वांडो स्पर्धेतही देवयानीने कांस्यपदक जिंकत सातत्यपूर्ण कामगिरीचा ठसा उमटवला होता.
देवयानीला प्रशिक्षक जयेश बाविस्कर आणि अजित घारगे यांचे बारकाईने मार्गदर्शन लाभले. त्यांच्या प्रशिक्षणाखाली देवयानीने शिस्तबद्ध सराव व फिटनेसकडे लक्ष देत ही यशस्वी कामगिरी साधली आहे. या विजयामुळे जळगाव जिल्ह्यातील इतर तरुण खेळाडूंनाही प्रेरणा मिळाली आहे.
देवयानीच्या यशाबद्दल जळगाव जिल्हा तायक्वांडो असोसिएशनचे अध्यक्ष तसेच जैन इरिगेशन सिस्टीम्स लि. चे सहव्यवस्थापकीय संचालक अतुल जैन, उपाध्यक्ष ललित पाटील, खजिनदार सुरेश खैरनार, सचिव अजित घारगे, सहसचिव रविंद्र धर्माधिकारी, सदस्य नरेंद्र महाजन, कृष्णकुमार तायडे, महेश घारगे, सौरभ चौबे तसेच जैन स्पोर्टस् अकॅडमीचे अरविंद देशपांडे यांनी देवयानीचे मनःपूर्वक अभिनंदन केले आहे.
