रावेर–लाईव्ह ट्रेंड्स न्यूज प्रतिनिधी । रावेर रेल्वे स्थानकाजवळ आज दुपारी घडलेल्या एका दुर्दैवी अपघातामुळे परिसरात खळबळ उडाली आहे. उत्तर प्रदेशातील कानपूर येथून प्रवास करणाऱ्या ५० वर्षीय प्रवाशाचा रेल्वेतून पडून जागीच मृत्यू झाल्याने हळहळ व्यक्त केली जात आहे. मृत प्रवाशाचे नाव राजेंद्र कुमार निकम असे असून, त्यांच्यासोबत त्यांचे काही नातेवाईकही प्रवास करत होते.
मिळालेल्या प्राथमिक माहितीनुसार, दुपारी सुमारे तीन वाजता मुंबई–कानपूर एक्सप्रेस रावेर रेल्वे स्थानकाजवळून सुटत असताना ही दुर्घटना घडली. प्रवासादरम्यान झोपेतून उठून बाथरूमकडे जाण्यासाठी निघालेले राजेंद्र कुमार यांचा अचानक तोल गेला आणि ते थेट खाली रेल्वे रुळांवर पडले. हा अपघात इतका भीषण होता की ते जागीच मरण पावले. ट्रेनने वेग घेतलेला असताना झालेल्या या घटनेमुळे उपस्थित प्रवाशांमध्ये आणि स्थानकावरील नागरिकांमध्ये भीतीचे वातावरण निर्माण झाले.
अपघाताची माहिती मिळताच रावेर येथील समाजसेवक रवी भाऊ पाटील व त्यांच्या मित्रपरिवाराने तात्काळ घटनास्थळी धाव घेतली. त्यांनी तत्काळ संबंधित यंत्रणेला कळवले आणि नंतर मृतदेह उचलून रावेरच्या स्मशानभूमीकडे नेण्यात आला. सामाजिक उत्तरदायित्वाची जाणीव ठेवत रवी पाटील आणि त्यांच्या कार्यकर्त्यांच्या उपस्थितीत अत्यंत शोकाकुल वातावरणात अंत्यसंस्कार करण्यात आले.
मृत राजेंद्र कुमार निकम यांच्यासोबत नितीन कुमार निकम, मंटु निकम, अनिकेत निकम, अनुज निकम हे नातेवाईकही प्रवास करत होते. त्यांच्या समोरच ही दुर्दैवी घटना घडल्याने कुटुंबावर दुःखाचा डोंगर कोसळला आहे. या अपघातामुळे प्रवासादरम्यान सुरक्षिततेच्या प्रश्नांवर पुन्हा एकदा चर्चा सुरू झाली आहे.
या दुर्दैवी घटनेच्या वेळी रवी भाऊ पाटील यांच्यासह प्रमोद रामदास महाजन, सुनिल दिलीप कोळी, योगेश कमलाकर महाजन, सनी रामकृष्ण महाजन, विशाल गणेश पाटील, चेतन सुभाष पाटील, ईश्वर संतोष महाजन, मोहीत चंद्रकांत महाजन आदी मान्यवर उपस्थित होते. त्यांची तत्परता आणि मदतीची भावना विशेष उल्लेखनीय ठरली.
राजेंद्र कुमार निकम यांच्या अपघाती मृत्यूनंतर रावेर परिसरात हळहळ व्यक्त केली जात आहे. अशा प्रकारच्या घटनांमुळे रेल्वे प्रशासनानेही प्रवाशांच्या सुरक्षिततेसाठी अतिरिक्त खबरदारी घेण्याची गरज व्यक्त केली जात आहे.
