जळगाव लाईव्ह ट्रेंडस न्यूज प्रतिनिधी । जळगाव येथील शिवकॉलनी भागात स्थित असलेल्या ओम श्री निष्कलंकी धामचा सोळावा वर्धापन दिन मंगळवार, १४ ऑक्टोबरपासून धार्मिक वातावरणात साजरा होण्यास सुरुवात झाली आहे. या वार्षिकोत्सवानिमित्त आयोजित महामंडलेश्वर स्वामी जनार्दनहरी महाराज यांच्या प्रवचनासाठी परिसरातील भाविकांनी मोठी गर्दी केली होती.
वार्षिकोत्सवाच्या पहिल्या दिवशी सकाळी ८ वाजता फैजपूर येथील संतपंत मंदिराचे गादीपती महामंडलेश्वर स्वामी जनार्दनहरी महाराज यांच्या शुभहस्ते ध्वजारोहण करण्यात आले. ध्वजारोहणाचा समारंभ झाल्यावर कळस महापूजा करण्यात आली आणि त्यानंतर लगेचच स्वामी महाराजांचे प्रवचन सुरू झाले.
स्वामी जनार्दनहरी महाराज यांनी आपल्या ओघवत्या वाणीने आणि सहज सोप्या उदाहरणांनी उपस्थित भाविकांना मोलाचे मार्गदर्शन केले. या प्रवचनाचा लाभ घेण्यासाठी महिला आणि पुरुषांची लक्षणीय उपस्थिती होती. निष्कलंकी धामच्या १६ वर्षांच्या या परंपरेमुळे परिसरातील नागरिकांमध्ये या उत्सवाबद्दल विशेष आस्था आहे. पुढील काही दिवस चालणाऱ्या या वार्षिकोत्सवात विविध धार्मिक विधी आणि कार्यक्रमांचे आयोजन करण्यात आले आहे.
