जळगाव – लाईव्ह ट्रेंड्स न्यूज प्रतिनिधी । शिवसेना (उद्धव बाळासाहेब ठाकरे) पक्षाच्या संघटनात्मक बांधणीला बळकटी देण्याच्या दृष्टीने एक महत्त्वाचा निर्णय घेण्यात आला आहे. जळगाव तालुकाप्रमुखपदी कुसुंबा येथील उपसरपंच प्रमोद घुगे यांची निवड करण्यात आली असून, या निवडीमुळे तालुका पातळीवर पक्षाचे कार्य अधिक गतिमान होण्याची अपेक्षा व्यक्त केली जात आहे.
पक्षप्रमुख उद्धव बाळासाहेब ठाकरे यांच्या आदेशाने आणि जळगाव लोकसभा संपर्कप्रमुख संजय सावंत यांच्या मार्गदर्शनाखाली ही नियुक्ती करण्यात आली आहे. शिवसेना संघटनेच्या अंतर्गत या निवडीला विशेष महत्त्व आहे, कारण स्थानिक पातळीवर पक्षाची पकड मजबूत करण्यासाठी सक्षम नेतृत्वाची गरज असते, आणि प्रमोद घुगे यांच्या रूपाने पक्षाला अनुभवसंपन्न आणि लोकाभिमुख नेतृत्व लाभले आहे.
या निवडीबाबत जळगाव लोकसभा संपर्कप्रमुख संजयजी सावंत, शिवसेना उपनेते गुलाबराव वाघ, माजी खासदार उन्मेषदादा पाटील, जिल्हाप्रमुख कुलभूषण पाटील, जळगाव लोकसभा संघटक करणदादा पवार, महानगरप्रमुख शरद तायडे आणि उपजिल्हाप्रमुख प्रा. भाऊसाहेब सोनवणे यांनी प्रमोद घुगे यांचे अभिनंदन केले आहे. सर्व स्तरातून या निवडीचे स्वागत होत असून, घुगे यांच्याकडून तालुक्यातील कार्यकर्त्यांच्या संवादाला आणि पक्षवाढीस प्राधान्य देण्याची अपेक्षा आहे.
प्रमोद घुगे हे कुसुंबा ग्रामपंचायतीचे उपसरपंच असून, त्यांना ग्रामपातळीवरील प्रशासनाचा आणि जनतेच्या प्रश्नांचा चांगला अनुभव आहे. या पार्श्वभूमीवर, तालुकास्तरावर पक्षसंघटनेचा विस्तार आणि कार्यकर्त्यांमध्ये नवचैतन्य निर्माण करण्याचे काम ते प्रभावीपणे पार पाडतील, असा विश्वास शिवसेनेच्या स्थानिक नेतृत्वाकडून व्यक्त करण्यात येत आहे.
