पारोळा – लाईव्ह ट्रेंड्स न्यूज प्रतिनिधी । पारोळा तालुक्यातील वंजारी खुर्द गावातील ग्रामस्थ आजही मूलभूत नागरी सुविधांपासून वंचित आहेत. गावात स्मशानभूमी नसल्यामुळे मृत व्यक्तींचे अंत्यसंस्कार शेताच्या रस्त्यावरच करावे लागत आहेत. या अमानवीय परिस्थितीविरोधात ग्रामस्थांनी आता आवाज उठवला असून, २४ सप्टेंबरपर्यंत स्मशानभूमीची सुविधा उपलब्ध न झाल्यास २५ सप्टेंबर रोजी सामूहिक आत्मदहन करण्याचा इशारा दिला आहे.
वंजारी खुर्द या गावात आजपर्यंत स्मशानभूमीची कोणतीही अधिकृत जागा उपलब्ध करून देण्यात आलेली नाही. त्यामुळे मृत व्यक्तीच्या अंत्यसंस्कारासाठी ग्रामस्थांना पावसाळ्याच्या काळातही चिखलात किंवा शेताच्या कडेला, रस्त्यालगत अंत्यसंस्कार करावे लागतात. ही केवळ असुविधा नाही, तर मानवी अस्मितेला चीड आणणारी परिस्थिती आहे, असे ग्रामस्थ म्हणाले. अनेक वेळा निवेदनं दिल्यानंतरही प्रशासनाने याकडे दुर्लक्ष केले आहे.
राजपूत करणी सेनेचे कोअर कमिटीचे राज्याध्यक्ष बाळासाहेब पाटील यांच्या नेतृत्वाखाली गावकऱ्यांनी आंदोलनाची भूमिका घेतली असून, प्रशासनाच्या निष्क्रियतेविरोधात त्यांनी तीव्र नाराजी व्यक्त केली आहे. यासंदर्भात ग्रामस्थांनी जिल्हाधिकारी, गटविकास अधिकारी आणि स्थानिक पोलिस निरीक्षक यांना निवेदन दिले आहे. विशेष म्हणजे, याच मागणीसाठी यापूर्वी १३ मार्च रोजीही निवेदन देण्यात आले होते. त्यानंतर जिल्हा परिषदेचे मुख्य कार्यकारी अधिकारी यांनी ३० दिवसांत ही समस्या मार्गी लावण्याचे लेखी आश्वासन दिले होते. मात्र १५० दिवस उलटल्यानंतरही प्रत्यक्षात काहीच झालेले नाही.
प्रशासनाच्या या उदासीनतेचा संताप आता गावकऱ्यांच्या संयमाच्या सीमेला पोहोचला आहे. त्यामुळे आता त्यांनी स्पष्ट शब्दांत सांगितले आहे की, जर २४ सप्टेंबरपर्यंत स्मशानभूमीसाठी कोणतीही ठोस कार्यवाही झाली नाही, तर २५ सप्टेंबर रोजी वंजारी खुर्द येथे सामूहिक आत्मदहन करण्यात येईल. हा इशारा केवळ निवेदनापुरता मर्यादित न राहता, त्यामागे गावकऱ्यांचा दृढ निर्धार आहे, हेही स्पष्ट झाले आहे.
या गंभीर प्रश्नाकडे प्रशासनाने तात्काळ लक्ष देणे गरजेचे आहे. अन्यथा एका मूलभूत नागरी सुविधेसाठी जीव धोक्यात घालण्याची वेळ सामान्य नागरिकांवर येणं, ही लोकशाहीसाठी चिंतेची बाब ठरू शकते.
