शेगाव- लाईव्ह ट्रेंड्स न्यूज प्रतिनिधी । भाद्रपद शुद्ध पौर्णिमेस म्हणजेच रविवार दि. ७ सप्टेंबर २०२५ रोजी होणाऱ्या खग्रास चंद्रग्रहणाच्या पार्श्वभूमीवर श्री संत गजानन महाराज मंदिर, शेगाव येथे काही महत्त्वाचे बदल करण्यात आलेले आहेत.
आज होणाऱ्या खग्रास चंद्रग्रहणाच्या पार्श्वभूमीवर श्री संत गजानन महाराज मंदिर, शेगाव येथे काही महत्त्वाचे बदल करण्यात आलेले आहेत. या ग्रहणाचे वेध दुपारी १२.५२ वा. सुरू होतील तर रात्री ९.५७ वा. ग्रहणास प्रारंभ होऊन उत्तररात्री १.२६ वा. ग्रहण सुटेल. यानिमित्त मंदिर प्रशासनाने भक्तांना आवाहन केले आहे की ग्रहणकाळात मंदिरातील पद्धतीत बदल होणार आहेत.
ग्रहणामुळे रविवारच्या दिवशी मंदिरात सायंकाळची सूर्यास्त व शेजारती होणार नाहीत. तसेच दुपारी १२.५२ वा. पासून भक्तांनी श्रींच्या दर्शनास येतांना हार, पुष्पमाला, पान-फुले, नारळ वा प्रसाद आणू नयेत, अशी सूचना देण्यात आली आहे. मात्र मंदिर खुले राहणार असून भक्तांना जाळीमधून महाराजांचे दर्शन घेण्याची सोय राहील.
याशिवाय मंदिर परिसरातील महाप्रसादालयात रविवारी दुपारी १२ वाजेपर्यंतच महाप्रसाद वितरणाची व्यवस्था राहील. त्यानंतर ग्रहणकाळात सेवा बंद ठेवली जाईल. मंदिराबाहेरील इतर प्रसादालये व अल्पोपाहार कक्ष मात्र नेहमीप्रमाणे सुरू राहतील. संतसेवा समितीने भक्तांना याबाबत आधीच माहिती देत आवश्यक ते सहकार्य करावे, असे आवाहन केले आहे.
