सातारा-लाईव्ह ट्रेंडस न्यूज प्रतिनिधी । पोलादपूर-महाबळेश्वर मार्गावर असलेल्या आंबेनळी घाटात शनिवारी दुपारी पावणेदोनच्या सुमारास एक मोठी दुर्घटना टळली. नाशिक जिल्ह्यातील दिंडोरी येथील विद्यार्थ्यांची सहल घेऊन आलेली एसटी बस (एमएच ४० एक्यू ६२२५) या घाटात अपघातग्रस्त झाली. बसमध्ये एकूण ६० विद्यार्थी होते आणि चालकाचे नियंत्रण सुटल्याने बस दरीत कोसळली.
प्रतापगडाहून महाबळेश्वरकडे निघालेली ही बस वाडा कुंभारोशी गावापासून दोन किलोमीटर अंतरावर आली असता, एका वळणावर चालकाचे नियंत्रण सुटले. बस रस्त्याच्या कडेला असलेल्या खोल दरीत घसरली. मात्र, सुदैवाने बसची चाके मातीच्या ढिगाऱ्यात अडकल्याने मोठा अपघात टळला. बस पलटी झाली असती, तर मोठी दुर्घटना घडली असती.
बस दरीत घसरताच विद्यार्थ्यांमध्ये एकच गोंधळ उडाला. मात्र, चालकाने प्रसंगावधान दाखवत विद्यार्थ्यांना आपत्कालीन दरवाजातून तातडीने बाहेर काढले. सर्व विद्यार्थी सुरक्षितपणे बसमधून उतरले आणि त्यांना मोठा धक्का बसला. या अपघातात कोणतीही जीवितहानी झाली नाही, ही मोठी दिलासादायक बाब आहे.
काही वेळात चालकाने बसला रस्त्यावर आणले आणि विद्यार्थ्यांसह बस महाबळेश्वरकडे रवाना झाली. या अपघातामुळे आंबेनळी घाटात काही वेळ वाहतूक थांबली होती. या घटनेमुळे विद्यार्थ्यांच्या मनात भीती निर्माण झाली होती, परंतु सुदैवाने सर्व विद्यार्थी सुरक्षित आहेत.
