रायपूर – वृत्तसेवा । छत्तीसगडच्या बीजापूर जिल्ह्यात सुरक्षाबळांनी मोठी नक्षलविरोधी कारवाई करत १२ नक्षलवाद्यांचा खात्मा केला आहे. या भीषण चकमकीत दोन जवान शहीद झाले असून, दोन जवान जखमी झाले आहेत.
नक्षलवाद निर्मूलनासाठी केंद्र सरकारने ठरवलेल्या उद्दिष्टांनुसार सुरू असलेल्या या मोहिमेला हे मोठे यश मानले जात आहे. ही चकमक बीजापूर-नारायणपूर सीमेजवळील जंगलात रविवारी सकाळी घडली.
बस्तर पोलिसांच्या माहितीनुसार, नक्षलवाद्यांविरोधात सुरू असलेल्या शोध मोहिमेदरम्यान सुरक्षाबळांचे नक्षलवाद्यांशी आमना-सामना झाले. दोन्ही बाजूंनी जोरदार गोळीबार झाला आणि त्यात १२ नक्षलवादी ठार झाले. मारे गेलेल्या नक्षलवाद्यांची संख्या आणखी वाढू शकते, अशी शक्यता व्यक्त करण्यात येत आहे.
सुरक्षाबळांनी या कारवाईत नक्षलवाद्यांकडून अनेक ऑटोमॅटिक शस्त्रे, दारुगोळा आणि अन्य अत्याधुनिक हत्यारे जप्त केली आहेत. ठार झालेल्या नक्षलवाद्यांची ओळख पटवण्याचे काम सुरू आहे. चकमकीत दोन जवान शहीद झाले असून, दोन इतर जवान जखमी झाले आहेत. जखमी जवानांवर तातडीने उपचार सुरू करण्यात आले आहेत.
केंद्र सरकारने ३१ मार्च २०२६ पर्यंत देशातून नक्षलवादाचे समूळ उच्चाटन करण्याचे उद्दिष्ट ठेवले आहे. या पार्श्वभूमीवर छत्तीसगडसह अनेक नक्षलग्रस्त भागांमध्ये सुरक्षाबळांनी मोठ्या प्रमाणावर मोहिमा सुरू केल्या आहेत. या मोहिमांमध्ये आतापर्यंत अनेक नक्षलवादी ठार करण्यात आले आहेत.
याआधी छत्तीसगड-ओडिशा सीमेजवळ झालेल्या एका मोठ्या चकमकीत १६ नक्षलवादी ठार झाले होते. या कारवाईत ९० लाख रुपयांचा इनामी नक्षलवादी चलपति देखील मारला गेला होता. या प्रकारच्या कारवायांमुळे नक्षलवाद्यांच्या हालचालींवर मोठा आघात झाला आहे.
