जळगाव- लाईव्ह ट्रेंड्स न्यूज प्रतिनिधी । गणेशोत्सवाच्या आनंददायी आणि उत्साही वातावरणात कै. सुनिता जगन्नाथ वाणी भगीरथ इंग्लिश स्कूलमध्ये एक अत्यंत आगळावेगळा आणि कौतुकास्पद उपक्रम राबविण्यात आला. शाळेतील तब्बल २५५ लहानग्या विद्यार्थ्यांनी आपल्या लाडक्या गणपती बाप्पाला थेट हाताने सुंदर आणि रंगबेरंगी अक्षरात पत्र लिहून आपल्या मनातील ‘मन की बात’ मांडली. या पत्रांच्या माध्यमातून चिमुकल्यांनी अभ्यासात प्रगती करण्यासोबतच चांगल्या सवयी अंगीकारण्याची भावूक व सकारात्मक शपथ बाप्पाच्या चरणी घेतली.
आजच्या डिजिटल आणि सोशल मीडियाच्या युगात विद्यार्थ्यांनी स्वतःच्या हाताने सुंदर पत्र लिहून लाडक्या बाप्पाशी साधलेला हा भावनिक संवाद उपस्थितांचे विशेष लक्ष वेधून घेणारा ठरला. विद्यार्थ्यांनी आपल्या पत्रांमध्ये “हे लाडक्या बाप्पा, आम्ही शपथ घेतो की यापुढे खूप चांगले वागणार, आई-वडील व गुरुजनांचे ऐकणार, मनापासून अभ्यास करून शाळेचे व देशाचे नाव उज्ज्वल करणार,” अशा सुंदर शब्दांत आपल्या भावना व्यक्त केल्या. केवळ अभ्यासापुरते मर्यादित न राहता मोबाईलचा वापर कमी करणे, मित्रांशी प्रेमाने वागणे आणि परिसर स्वच्छ ठेवून कचरा न करणे अशा दैनंदिन आयुष्यातील अत्यंत महत्त्वाच्या सवयी बदलण्याची ग्वाही विद्यार्थ्यांनी बाप्पाला दिली.
शाळेतील गणेशोत्सव समिती प्रमुख संगीता पाटील यांनी विद्यार्थ्यांचे कौतुक करत या पत्रांमुळे मुलांमध्ये नैतिक मूल्ये आणि जबाबदारीची जाणीव निर्माण होईल असा विश्वास व्यक्त केला. शाळेचे मुख्याध्यापक एस. पी. निकम यांनी विद्यार्थ्यांनी पत्रात दिलेल्या वचनांनुसार वागल्यास त्यांचे भविष्य निश्चितच उज्ज्वल होईल असे सांगत सर्व मुलांचे अभिनंदन केले. या बालकांच्या सकारात्मक शपथेचे आणि उपक्रमाचे सर्व पालकांकडून व समाजातून भरभरून कौतुक होत आहे. या चिमुकल्यांना शाळेचे आदर्श शिक्षक किरण विठ्ठल पाटील यांनी मोलाचे मार्गदर्शन केले, तर ए. जे. शेलकर यांनी सहकार्य केले.
