मुक्ताईनगर-लाईव्ह ट्रेंड्स न्यूज प्रतिनिधी । भुसावळ उपविभागातील भुसावळ, बोदवड आणि मुक्ताईनगर या तीन तालुक्यांमधील गावांमध्ये गेल्या काही काळापासून रिक्त असलेल्या पोलीस पाटील पदांच्या भरतीचा मार्ग अखेर मोकळा होण्याची शक्यता निर्माण झाली आहे. प्रशासनाकडून या रिक्त पदांच्या भरती प्रक्रियेला गती देण्यात आली असून, प्राथमिक टप्प्यात आरक्षण निश्चितीसाठी हालचाली सुरू करण्यात आल्या आहेत. या निर्णयामुळे ग्रामीण भागातील कायदा व सुव्यवस्था राखण्यात महत्त्वाची भूमिका बजावणाऱ्या पोलीस पाटील पदांच्या नियुक्तीची प्रतीक्षा आता लवकरच संपणार आहे.
उपविभागीय कार्यालय भुसावळ येथील तहसील सभागृहात गुरुवार, दिनांक ५ नोव्हेंबर २०२६ रोजी सकाळी ११ वाजता पोलीस पाटील भरती सन २०२६ च्या आरक्षण निश्चितीची बैठक आयोजित करण्यात आली आहे. या बैठकीत शासनाच्या प्रचलित आरक्षण धोरणानुसार तसेच विविध शासन निर्णयांच्या आधारे अनुसूचित जाती (SC), अनुसूचित जमाती (ST), विमुक्त जाती (VJ), भटक्या जमाती (NT), विशेष मागास प्रवर्ग (SBC), इतर मागास प्रवर्ग (OBC), आर्थिकदृष्ट्या दुर्बल घटक (EWS) आणि सामाजिक व शैक्षणिकदृष्ट्या मागास प्रवर्ग (SEBC) या सामाजिक प्रवर्गांनुसार पदांची वर्गवारी केली जाणार आहे. याशिवाय, महिलांसाठी लागू असलेल्या ३० टक्के समांतर आरक्षणाची तरतूदही या प्रक्रियेत अमलात आणली जाणार आहे.
भुसावळ उपविभागातील एकूण २२ गावांमध्ये ही पदे रिक्त आहेत. यात भुसावळ तालुक्यातील विहळाळे, निंभोरा खुर्द, टहाकळी, पिंप्रीसेकम, जोगलखोरी, मानपूर, अंजनसोंडे आणि सावतर निंभोरा या ८ गावांचा समावेश आहे. बोदवड तालुक्यातील धानोरा, रेवती, पळासखेडा खुर्द, भानखेडा, जलचक्र बुद्रुक, वराड खुर्द आणि वरखेड खुर्द या ७ गावांमध्ये पदे भरली जाणार आहेत. तर मुक्ताईनगर तालुक्यातील मुक्ताईनगर, हिवर, पंचाणे, राजुरा, भोकरी, डोलारखेडा आणि कासारखेडा या ७ गावांचा यामध्ये समावेश आहे.
