जळगाव लाईव्ह ट्रेंड्स न्युज प्रतिनिधी । आपल्या आईच्या समोर धावत्या रेल्वेतून तोल गेल्याने पिंप्राळा येथील राहणाऱ्या २० वर्षीय तरूणाचा उपचारादरम्यान मृत्यू झाल्याची दुदैवी व हृदयद्रावक घटना रविवारी १२ फेब्रुवारी रोजी सकाळी ९ वाजेच्या सुमारास घडली आहे. याप्रकरणी नशिराबाद पोलीस ठाण्यात अकस्मात मृत्यूची नोंद करण्यात आली आहे.
प्रणव विजय बारी (वय-२०) रा. गांधी चौक, पिंप्राळा, जळगाव असे मृत तरूणाचे नाव आहे.
याबाबत अधिक माहिती अशी की, प्रणव बारी हा आई-वडीलांसह प्रिंप्राळा भागातील गांधी चौकात वास्तव्याला होता. सध्या तो पुण्यातील सिंहगड कॉलेजमध्ये शिक्षण घेत होता. काही दिवसांपुर्वी तो जळगावात आलेला होती. शुक्रवारी १० फेब्रुवारी रोजी प्रणव हा आई ज्योती बारी यांच्यासोबत भुसावळ येथे मावशीकडे भेटण्यासाठी गेलेले होते. मावशी व मावस भावाला भेटून रविवारी १२ फेब्रुवारी रोजी सकाळी ७ वाजता प्रणव हा आईसोबत जळगाव येथे येणासाठी भुसावळ मेमू रेल्वेत बसला होता. रेल्वेगाडीने भुसावळ स्टेशन सोडल्यानंतर काही अंतरावर असलेल्या स्वामी समर्थ मंदीराजवळून रेल्वे जात असतांना प्रणवचा तोल गेल्याने तो धावत्या रेल्वेतून आई देखत खाली पडला. हा प्रकार आईच्या लक्षात आल्यानंतर त्यांनी आरडाओरड केली. रेल्वेची चैन ताणून रेल्वेथांबवून आईने धाव घेतली. तातडीने भुसावळ येथे राहणाऱ्या बहिणीच्या मुलगा राकेश याने घटनास्थळी धाव घेवून जखमीवस्थेत प्रणव याला गोदावरी येथील खासगी रूग्णालयात हलविण्यात आले. सकाळी ९ वाजता त्यांचा उपचारादरम्यान प्राणज्योत मालविली. मुलाच्या मृत्यूमुळे आई ज्योती बारी यांना मोठा मानसिक धक्का बसला आहे. प्रणवची मोठी बहिण स्वामीनी ही पुण्यात नोकरी करत असून प्रणव हा बहिणीसोबतच राहत होता. वडील कांदा बटाटे विक्री करून आपला उदरनिर्वाह करतात. प्रणवच्या अचानक गेल्याने परिसरात हळहळ व्यक्त होत आहे. जळगाव जिल्हा शासकीय वैद्यकीय महाविदयालयात शवविच्छेदन करण्यात आले. या घटनेबाबत नशिराबाद पोलीस ठाण्यात अकस्मात मृत्यूची नोंद करण्यात आली आहे.
