नवी दिल्ली : वृत्तसंस्था । पूर्व लडाख भागात चीन सीमेवर भारतीय सेनेनं २० दिवसांत मोठं यश मिळवलंय. भारतीय सेनेची स्थिती आणखीन मजबूत झाली भारतीय सेनेनं चीनच्या ‘पिपल्स लिबरेशन आर्मी’चे मनसुबे धुळीला मिळवलेत. लडाख सीमेवरच्या सहा नव्या टेकड्यांवर भारतीय सेनेनं ताबा मिळवलाय. भारतीय सेनेवर दबाव टाकण्याच्यादृष्टीनं चिनी सेना या टेकड्यांवर ताबा मिळवण्याच्या प्रयत्नात होती.
या टेकड्यांमध्ये मागर हिल, गुरुंग हिल, रेजांग ला, राचाना ला, मोखपारी आणि फिंगर ४ च्या जवळपच्या टेकड्यांवर उंचावरच्या भागावर भारतीय जवान दाखल झालेत. या टेकड्या आत्तापर्यंत रिकाम्याच होत्या. चिनी सैनिक या टेकड्यांवर दाखल होण्याआधीच भारतीय जवानांनी या भागावर नियंत्रण मिळवलंय.
या टेकड्या दक्षिणेकडून उत्तरेपर्यंत पसरलेल्या आहेत. भारतीय सैन्याला मिळालेल्या या यशानं भारत – चीन संघर्षादरम्यान भारताचं स्थान आणखीन मजबूत होण्यास मदत मिळालीय.
भारत आणि चिनी सेनेदरम्यान ‘लाईन ऑफ अॅक्च्युअल कंट्रोल’ लागून असलेल्या टेकड्यांवर ताबा मिळवण्यासाठी २९ ऑगस्टपासून संघर्षाला सुरूवात झाली. चिनी सैनिकांनी अवैधरित्या पॅन्गाँग सरोवराच्या दक्षिणेकडील तटाजवळ थाकुंग क्षेत्राच्या दक्षिणेतील टेकड्यांवर ताबा मिळवण्याचा प्रयत्न केला. त्यानंतर मात्र भारतीय सेनेच्या जवानांनी आणखी सहा टेकड्यांवर ताबा मिळवलाय.
त्यामुळे चीन पुरता गोंधळून गेलाय. २९ ऑगस्टनंतर दोन्ही देशांदरम्यान तीन वेळा हवेत गोळीबाराची घटना घडली. दोन्ही देशांदरम्यान सैन्य स्तरावर चर्चा पुढे सरकू शकलेली नाही. चीनकडून चर्चेची तारीख अद्याप निश्चित करण्यात आलेली नाही. त्यामुळे चर्चेत कोणतीही सकारात्मक प्रगती दिसून आलेली नाही.
ब्लॅक टॉप आणि हेल्मेट टॉप एलएसीच्या दुसऱ्या बाजुला आहे. भारतीय जवान एलएसीच्या भारताकडील बाजुलाच आहेत. भारताच्या या कारवाईनंतर चिनी सेनेनं ३००० अतिरिक्त सैनिकांना रेझांग ला आणि रेचिन लाजवळ तैनात केलंय. यामध्ये पीएलएच्या एन्फन्ट्री आणि आर्मर्ड युनिटसच्या जवानांचा समावेश आहे. चिनी सेनेच्या मोल्दो युनिटलाही कामाला लावण्यात आलंय.
चिनी सेनेच्या अतिक्रमणांचा वारंवार होणारा प्रयत्न रोखण्यासाठी भारतीय सेनेकडूनही ऑपरेशन्स राबवण्यात येत आहेत. या ऑपरेशन्सवर राष्ट्रीय सुरक्षा सल्लागार अजित डोवाल, संरक्षणप्रमुख जनरल बिपिन रावत आणि लष्कर प्रमुख मनोज मुकुंद नरवणे हे स्वत: लक्ष ठेवून आहेत.
