जळगाव-लाईव्ह ट्रेंडस न्यूज प्रतिनिधी । शहरातील नवीन बसस्थानकाजवळील भजे गल्ली परिसरात एका कटलरी व्यवसायिकाला किरकोळ कारणावरून एकाने दमदाटी करून प्लास्टिक वस्तू डोक्यावर मारून गंभीर दुखापत केल्याची घटना मंगळवारी ४ एप्रिल रोजी दुपारी १ वाजता घडली आहे. याबाबत जिल्हापेठ पोलीस ठाण्यात गुन्हा दाखल करण्यात आला आहे.
जिल्हापेठ पोलीस सूत्रांकडून मिळालेली माहिती अशी की, मधुकर चिंतामण वाणी (वय-५५) रा. लाठी हायस्कूल, जळगाव हे आपल्या परिवारासह वास्तव्याला आहे. कटलरी व्यवसाय करून ते आपला उदरनिर्वाह करत असतात. ते नवीन बसस्थानकाजवळील भजे गल्लीत हातगाडी लावून व्यवसाय करतात. मंगळवार ४ एप्रिल रोजी दुपारी १ वाजता मधुकर वाणी हे दुकानावर असताना, त्या ठिकाणी हर्षल विजय चौरसिया रा. नाथवाडा शिंधी कॉलनी, जळगाव हा तिथे आला. ‘मला चाकू सूरी दे’ असे दुकानदार मधुकर वाणी यांना सांगितले. त्यावर ‘मी चाकू सुरी विकत नाही’ असे सांगितले, याचा राग आल्याने हर्षल चौरसिया याने प्लास्टिकचा स्टूल मधुकर वाणी यांच्या डोक्यात टाकून गंभीर दुखापत केली. या घटनेनंतर संशयित हर्षल चौरसिया हा पसार झाला तर जखमी झालेल्या मधुकर वाणी यांना शासकीय वैद्यकीय महाविद्यालयात उपचारासाठी दाखल करण्यात आले. या घटनेबाबत मधुकर वाणी यांनी दिलेल्या फिर्यादीवरून रात्री १० वाजता संशयीत आरोपी हर्षल विजय चौरसिया याच्या विरोधात जिल्हापेठ पोलीस ठाण्यात गुन्हा दाखल करण्यात आला आहे. पुढील तपास पोलीस हेडकॉन्स्टेबल मनोज पवार करीत आहे.
