मुंबई: वृत्तसंस्था । हाथरसच्या पीडितेच्या कुटुंबीयांना भेटण्यासाठी निघालेल्या काँग्रेस नेत्या प्रियांका गांधी यांच्याशी उत्तर प्रदेशातील पोलिसांनी केलेल्या गैरवर्तनाचा भाजपच्या महिला नेत्या चित्रा वाघ यांनी निषेध केला आहे. वाघ यांच्या ट्वीटचं स्वागत करताना काँग्रेसनं भाजपला बोचरा टोला हाणला आहे.
हाथरसवरून सध्या देशातील राजकीय वातावरण तापलं आहे. पीडितेच्या कुटुंबीयांना न्याय मिळावा अशी मागणी देशभरातून होत आहे. हीच मागणी करत काँग्रेस नेत्या प्रियांका गांधी हाथरसला निघाल्या होत्या. पोलिसांनी त्यांना अडवलं व गैरवर्तन केलं.
२०१९च्या विधानसभा निवडणुकीपूर्वी भाजपमध्ये प्रवेश केलेल्या व सध्या भाजपच्या महिला उपाध्यक्ष असलेल्या चित्रा वाघ यांनीही या प्रकाराचा निषेध केला आहे. ‘एका महिला नेत्याच्या कपड्यांना हात लावायची हिंमतच पोलिसांनी कशी केली? ही बाब केवळ राजकारणातील महिला नेत्यापुरती मर्यादित नाही. कुठलीही महिला असेल, पोलिसांनी अशा पद्धतीने आपली मर्यादा ओलांडता कामा नये,’ असं वाघ यांनी ठणकावलं आहे.
‘हा पक्षाच्या पलीकडचा विषय आहे. उत्तर प्रदेशचे मुख्यमंत्री योगी आदित्यनाथ हे भारतीय संस्कृतीचा मान राखणारे आहेत. त्यांनी पोलिसांवर ताबडतोब कारवाई करायला हवी,’ अशी मागणीही त्यांनी केली आहे. ‘ पोलिसांनी कोरोना योद्धे म्हणून चांगलं काम केलं, पण अधूनमधून अशा घटना घडतात. हे सगळं चुकीचं आहे. हे देशात कुठेही होता कामा नये, अशी भावनाही त्यांनी व्यक्त केली.
वाघ यांच्या या भूमिकेचं काँग्रेसनं स्वागत केलं आहे. ‘ महिला नेत्या म्हणून पक्षीय जोडे बाजूला ठेवून चित्राताईंनी घेतलेली भूमिका स्वागतार्ह आहे. पक्ष बदलला असला तरीही त्या संस्कार व विचार विसरल्या नाहीत ह्याचा अभिमान आहे,’ असं ट्वीट महाराष्ट्र युवक काँग्रेसचे अध्यक्ष सत्यजीत तांबे यांनी केलं आहे. ‘मात्र, आपलं बोलणं योगीनाथ ऐकतील का? हा प्रश्न आहेच,’ असा टोलाही त्यांनी हाणला आहे.
